Ssenkulu w’ekitongole ky’eggwanga ekivunanyizibwa ku mutindo gw’ebyamaguzi nga mu kiseera kino ali muluwumula olukake David Livingstone Ebiru ,yekyusirizza mu kiti ng’embazzi, amenyeewo ebigambo byeyayogera nti yagulirira bakamabe abatuula ku lukiiko olufuga ekitongole kino nti yabawa obukadde bwa shs 100 nti bamuttire ku liiso endagaano ye ereme kusazibwamu.
Ebiru yabyogerera mu kakiiko ka parliament akalondoola entambuza y’emirimu mu bitongole bya government aka COSASE akakulemberwa omubaka wa Nakawa West Joel Ssenyonyi.
Yategeeza nti omulimu gwe bwegwali mu lusuubo ng’abakulu bagala okumugoba ku kifo kyobwa ssenkulu bwa UNBS, yakwata ekyoogya mumiro kya bukadde bwa shs 100 nabuwa ba memba b’olukiiko lwa board y’ekitongole kino, nti bamuttire ku liiiso, baleme kusazaamu ndagaano ye.
Wabula David Livingstone Ebiru era asinzidde mu kakiiko ke kamu ebigambo ebyo nabimenyawo.
Agambye nti ku lunaku lweyabyogererako yali yetaasa olw’akazito akaali kamuteereddwako, songa ne ssentebe w’olukiiko lwa board ya UNBS yali tamutaasa ng’ayongera kumukomerera.
Ebiru agambye nti okuva lweyabyoogera, bireesewo embeera etali nnungi, wabula yatudde ne ssentebbe wa board ensonga nebazimaliriza.
Wabula Ssentebe w’akakiiko ka parliament kano Joel Ssenyonyi abuulidde omukulu ono David Livingstone Ebiru nti newankubadde kirungi abakulu okukaanya n’okukolera awamu, ensonga za vvulugu ali mu kitongole kino, zikyanoonyerezebwako police, kaliisoliiso wa government n’ebitongole ebirala ebinoonyereza.
Minister w’ebyobusuubuzi, amakolero n’ebibiina by’obwegasi Francis Mwebesa yalagidde David Livingstone Ebiru okuddako ebbali okumala ebbanga lya myezi 6, anoonyerezebweko ku vvulugu gwazze yenyigiramu.#