Ssenkulu wa KCCA ow’ekiseera Nyakaana Frank Lusa agambye nti essira agenda kulissa kukutereeza ekifaananyi ky’ekitongole ng’alwanyisa enguzi.
Nyakaana agambye nti awulidde abantu bangi omuli abasulamu, abasuubuzi, bannabyabufuzi n’abakulembeze ku mitendera egy’enjawulo abazze balaajana olw’enguzi nti essuukiridde mu KCCA.
Agambye nti ng’ali wamu ne banne bwebaaweereddwa obuvunaanyizibwa bw’okukulembera KCCA okumala ebbanga lya myezi 3, baasazeewo nti mu lutalo luno olw’okulwanyisa enguzi, batuuse n’okuyimiriza abamu ku bakozi, singa banaakwatibwa mu bulyi bw’enguzi.
Ssenkulu Frank Nyakaana abadde ayogerako eri ab’amawulire ku nteekateeka gy’alina mu bukulembeze bwe obw’emyezi 3.
Mulimu okumaliriza enguudo ezikolebwa zive ku bitundu 20% okulinnya ku bitundu 40%.
KCCA esuubira okukungaanya ensimbi obuwumbi bwa shs 31, onwezi gwa December,2024 wanaagwerako.
Mu nteekateeka eno mulimu n’okuyonja ekibuga n’okusimbamu omuddo.
Awadde eky’okulabirako nti Kampala ng’ekibuga ky’eggwanga ekikulu kiringa eddiiro mu maka, n’olwekyo kirina okukuumibwa nga kiyonjo, kireme okugoba abagenyi, ate n’abakibeeramu basobole okukyeyagaliramu.
Mu ngeri yeemu ategeezezza nti bakutuula okwetegereza ebya Kampuni enaakulakulanya ekifo kye Kiteezi awayibwanga kasasiro, enaaweebwa omulimu guno ayisibwe mu mitenderera emituufu.
Agambye nti ebya Kampuni ya Jespong eye Ghana nga KCCA tebabimanyiiko.
Mu kiseera kino eyali ssenkulu wa KCCA Dorothy Kisaka, n’omumyukawe Eng David Luyimbaazi , n’eyali akulira eby’obulamu mu KCCA Dr.Daniel Okello bali ku alimanda mu kkomera e Luzira.
Baaggulwako emisango 57 omuli n’okulagajjalira emirimu gyabwe, ekyaviirako entuumu ya kasasiro we Kiteezi okubumbulukuka naaziika abantu, emirambo 35 gyejazuulwa, wadde nga waliwo n’ebigambibwa nti abalala babulira wansi mu kasasiro.#
