Ba sipiika b’amawanga g’abazungu agaaliko amatwale ga Bungereza agagwa mu mukago gwa common wealth mu kibiina kyabwe ekibagatta ki Conference of Speakers and Presiding officers of the common wealth tebalabiseeko mu lukungaana lwabwe olugenda mu maaso e Munyonyo mu Kampala Uganda.
Olukungaana luno olw’ennaku esatu lutudde ku Speke resort hotel e Munyonyo, president Yoweri Kaguta Museven y’alugguddewo mu butongole.
Amawanga 56 gegagwa mu mukago gwa Common wealth.
Bungereza yennyini eyafuga amawanga gano, sipiika waayo taliiyo e Munyonyo
Sipiika wa parliament ya Canada, eyagunjaawo olukungaana luno mu mwaka gwa 1969 naye talabiseeko mu tabamiruka waba sipiika agenda maaso e Munyonyo
Amawanga ga Ssemazinga Europe agaafugibwa Bungereza agali mu common wealth okuli Bungereza, Malta ne Cyprus ba sipiika baago tebalabiseeko.
Amawanga ga Ssemazinga Africa agaafugibwa Bungereza, saako amawanga ga Pacific ne Caribbean gegasinze okwettanira olukungaana luno
Sipiika wa parliament ya Kenya Moses Wetangula mu katambi akakwatiddwa okuva mu kukubagaanya ebirowoozo okugenda mu maaso , yemulugunyizza ku ggwanga lya Bungereza eryafuga amawanga gano olwobutalabikako mu lukungaana luno
Wetangula akisiinyizaako nti bawuliddeko nti Bungereza yennyini yeyaperereza amawanga agamu obutaweereza ba sipiika baazo mu lukungaana luno olutudde mu Uganda.
Okusinziira ku parliament ya Uganda ,ba sipiika 33 bokka bebetabye mu lukungaana luno kwabo 43 abaali bakakasizza nti bakulwetabamu.
Kinnajjukirwa nti Uganda okuva lweyayisa etteeka eriwera omukwano n’obufumbo obwekikula ekimu, amawanga g’abazungu okuli Canada, Bungereza n’amalala gaagirabula era gaasuubiza nti gakuteeka ekkoligo ku Uganda ku bintu ebyanjawulo byekolagana nayo, nga kigambibwa nti yandiba emu ku nsonga ebagaanye okwetaba mu ttabamiruka wa ba sipiika ba parliament atudde e Munyonyo.#
