Ekibiina ekiddukanya omupiira ku semazinga Africa ekya CAF, kironze ddiifiri munnauganda omukazi Shamirah Nabadda, nga omu ku baddifiri abagenda okulamula mu mpaka za Women Africa Cup of Nations ez’omwaka guno 2025.
Empaka zino zigenda kutegekebwa Morocco, era zigenda kuzannyibwa okuva nga 07 okutuuka nga 26 July.
Omugatte baddiifiri 46 be bagenda okulamula mu mpaka zino, era Shamirah Nabadda yoomu ku baddifiri 18 abagenda okubeera mu kisaawe wakati.
Shamirah Nabadda alina obumanyirivu okulamula empaka eziri ku mutendera gw’ensi yonna, nga yalamula mu mpaka za Olympics 2024, empaka za Women Africa Cup of Nations ne CAF Women’s Champions League eza 2023, ne FIFA U17 Women’s World Cup eza 2024 ezaali mu Dominican Republic.
South Africa be bannantamegwa b’empaka ezasembayo eza Women Africa Cup of Nations ezaaliwo mu 2023, nga ku final baakuba Morocco goolo 2-1.
Nigeria yekyasiinze okuwangula ekikopo emirundi emingi 9, wabula nga Tanzania omulundi guno ye ttiimu yokka okuva mu East Africa egenda okuvuganya mu mpaka zino.
Bisakiddwa: Isah Kimbugwe
