Ttiimu y’eggwanga ey’omuzannyo gwa Rugby eya Uganda Rugby Cranes, etandise bubi ddala mu mpaka za Rugby Africa Cup of Nations bwekubiddwa Kenya obugoba 32-24.
Empaka zino zitandise olwaleero nga 08 July,2025 mu kisaawe e Namboole.
Amawanga 8 gegazeetabyemu, era zijja kukomekerezebwa nga 19 omwezi guno ogwa July.
Oluvanyuma lwa Uganda okukubwa Kenya, olwo kati Uganda eremereddwa okwesogga omutendera gwa semifinal, nga kati egenda kulwanira bifo.
Emizannyo emirala, Zimbabwe ekubye Morocco obugoba 43-8.
Algeria ekubye Ivory Coast obugoba 41-06.
Namibia nayo ekubye Senegal obugoba 55-17.
Ku mutendera gwa Semifinal Zimbabwe egenda kuttunka ne Kenya, ate nga Algeria egenda kuzannya ne Namibia, nga gyonna gya ku Sunday nga 13 July.
Mungeri yeemu Uganda Rugby Cranes ejja kukomawo mu kisaawe ku Sunday nga 13 okulwanira ekifo eky’okutaano ng’ettunka ne Morocco.
Empaka zino mu kuggulwawo olwaleero zetabidwako abakulembeze okuva mu Bwakabaka bwa Buganda okubadde omumyuka ow’okubiri owa Katikkiro era omuwanika Owek Robert Waggwa Nsibirwa ne minister wabavubuka ebyemizannyo n’ebitone Owek Ssalongo Robert Sserwanga.
Bisakiddwa: Isah Kimbugwe
