President wa Uganda Yoweri Kaguta Museveni, akakasizza nti ensimbi zeyasubiza okuwa ttiimu y’eggwanga eya Cranes ku buli mupiira gwe yawangula mu mpaka za CHAN, nti ensimbi zatuuse dda ku account za bazannyi.
President Museveni bino abyogeredde mu maka g’obwa President e Ntebe, ku kyeggulo kyategekedde ttiimu eno okugiyozayoza olw’okukola obulungi mu mpaka za CHAN.
Uganda ye yategeka empaka zino nga ekolagana ne Kenya ne Tanzania, era yawandukira ku mutendera gwa quaterfinal.
President Museveni yasuubiza nti buli mupiira Uganda Cranes gwewangula mu mpaka zino, bakufuna ensimbi akawumbi kamu n’obukadde 200, era Uganda Cranes yawangula emipiira 2 gyokka.
President Museveni akakasizza nti ensimbi obuwumbi 2 n’obukadde 400 zaatuuse dda eri abazannyi bano.
President Museveni era alagidde nti mu kwongera okusitula ebyemizannyo, amasomero agatalina bisaawe galeme kuddamu kuweebwa licence.
Minister w’ebyemizannyo ne byenjigiriza Janat Kataha Museveni yebazizza bonna abalina kye bakoze Uganda okutegeka empaka za CHAN mu kitiibwa.
President wa FUFA Ssalongo Eng Moses Magogo agambye nti empaka za CHAN lwali lupimo okuzuula Uganda wetuuse mu kwetegekera okutegeka empaka za AFCON 2027, nga noolwekyo Uganda tesaana kwesulirayo gwannagamba.
Bisakiddwa: Isah Kimbugwe
