Parliament ya Uganda eyisizza etteeka eriruηηamya ebiyiiye ebyenjawlo omuli ennyimba, emizannyo, ebitontome ne Katemba erya Copyright and Neighbouring Amendment bill 2025.
Ebbago lino lizze lyogeza abayiiya, ne bannakatemba ebisongovu, nti olwokulwaawo okuyisibwa, nga bagamba nti kizze kibalemesa okuganyulwa mu biyiiye byabwe.
Wiiki ebadde eeyiseewo namba ng’ababaka bakubagana empawa ku nnyingo ezimu mu tteeka lino, ekyaliviirako okwongezebwayo wiiki namba nga teriyisibwa.
Mu lutuula lwa parliament olwanga 16 Mar h,2026, abayimbi ,bannakatemba n’abayiiya abalala abali eyo mu 50, bakedde ku parliament okubaawo ng’abajjulizi ng’ababaka kukubaganya ebirowoozo ku bbago lino eribakwatako obutereevu.
Bakulembeddwamu omuwabuzi wa President ku biyiiye Edrisa Musuuza amanyiddwanga Eddie Kenzo, era oluvannyuma lwa Parliament okuyisa etteeka lino, abayimbi bakoolobezza ennyimba ezitendereza Omutonzi.
Omuyambi Edrisa Musuuza yebaziza bayambi banne olw’obumu bwebalaze mu kuyisa ebbago lino.
Commissioner wa parliament Owek Mathias Mpuuga Nsamba ayogeddeko nabamu ku bayambi bano, nabawabula nti nga bwebataddewo akazito okulaba nti etteeka lino liyisibwa, tebasa mukomo bagende mu maaso nga babanja okulambika kwetteeka lino kisobozese eteeka lino okutandiika okukola mu bwangu bwebaba bakuliganyulwamu.
Ebimu ku biri mu tteeka
Etteeka liyisiddwa era nga mulimu ennyingo eziteekawo ebibonerezo ebikakali eri abantu abakozesa ebiyiiye by’abalala mu bumenyi bw’amateeka, okubikyusakyusa nebakolamu ebyabwe nga bwebaagala.
Ekibonereza kyakusibwa emyaka 10 oba okusasula engassi ya bukadde bwa shs 40.
Mu tteeka lino eriyisiddwa, emikutu gy’amawulire okuli TV, Radio, emikutu emigatta bantu, abategesi bebivvulu, disco nebirala egikozesa ebiyiiye by’abalala okusanyusa abawuliriza n’ekigendererwa eky’okufunamu ensimbi, bakusasulangayo omutemwa gw’ensimbi bannanyini biyiiye bino bafunemu mu buyiiya bwabwe
Emikutu gyempuliziganya naddala egy’essimu egikozesa ebiyiiye by’abantu okuli ennyimba ebitontone ne Katemba byakusasulanga omutemwa gw’ensimbi eri bannanyini biyiiye bino
Wakati mu kukubaganya ebirowoozo ku bbago lino, omubaka wa Kanyum Simon Peter Okwalinga asabye government nti nga abayiiya bwebagenda okuweebwa omutemwa gw’ensimbi okuva eri emikutu gy’amawulire egikozesa ebiyiiye byabwe, nabo government etandike okubasoloozaako omusolo okuva ku nsimbi zebafuna mu kuyimba ku mikolo gy’embaga ,okwanjula n’ebirala.
Oluvanyuma lwa palament okuyisa etteeka lino, parliament yakulisindiika eri omukulembeze w’eggwanga okulyetegereza n’okulisaako omukono.
Oluvanyuma lyakukubwa mu kyapa litandike okussibwa mu nkola, nga ne minister wa ssemateeka n’essiga eddamuzi bwakola okuluηηamya okunasobozesa etteeka lino okukola.#
