Abantu abavudde mu bitundu bya Uganda ebyenjawulo naddala bannabuddu bajjumbidde omwoleso gwa CBS Pewosa ogumaze ennaku 6 nga gubumbujjira ku mbuga y’essaza Buddu mu kibuga Masaka.
Abantu ba bulijjo, amakampuni n’ebitongole ebyenjawulo byolesezza ebintu byebakola, ekyongedde okwoleka obuyiiya obwettaniddwa bannauganda.
Omwoleso guno gutambulidde ku kutumbula obulimi ne tekinologiya.
Abakulembeze n’abakugu abenjawulo abagulambudde okwongera okuwa aboolesi amagezi ku ngeri y’okwongera okwekulaakulanya, saako n’abalambuzi abeeyiyeeyo mu bungi okubaako byebayiga, nabo baddeyo babeeko byebetandikirawo bekulaakulanye.
Ebibiina bya CBS pewosa ebyenjawulo bivuganyizza mu mizanyo ebyenjawulo egitegekeddwa mu mwoleso, era ng’Essaza Mawogola lisitukidde mu mpaka zino nga bawangudde pikipiki okuva mu Simba Automotives.
Abavuganyizza bebazizza Radio y’Omutanda olw’okubayambako okutuukiriza ebirooto byabwe
Kwaya ya St Raphael Kitovu yewangudde ekikopo Kya kwaaya esinze okuyimba enyimba ezitendereza omutonzi mu mpaka ezibadde mu mwoleso
Omwami we ssaza Kyagwe Matovu Vicent, Katikkiro wa Buganda eyawummula Owek.Mulwanyammuli Ssemwogerer be bamu u balambudde omwoleso guno nebatenderezza obuyiiya obwolesedwa banna Uganda
Waliwo abazze mu mwoleso okukeberebwa endwadde, abasawo bavudde mu ddwaliro lya Kitovu Hospital ne Grass International nga bano bakebera abantu omubiri gwonna okumanya endwadde ezibaluma.
Omwoleso guggalwawo olwa leero nga 15 September,2025.#
