Ddoozi z’eddagala emitwalo Kumi Namukaaga (16) zezakaweebwa District ey’e Ssembabule, mu kaweefube wa government ow’okulwanyisa ekirwadde kya Kalusu mu magana (foot and mouth disease)
Minister Omubeezi ow’amagana mu Ggwanga Bright Lwamirama, ategeezezza nga bwebamaze okuweereza eddagala erigema Kalusu mu bitundu byonna ebya Uganda, nga bagala okuteekawo enkola ey’okugema ebisolo wonna Okwetoloola Uganda buli Mwaka, okulinnya ku nfeete ekirwadde kya Kalusu.
Akulira eby’obujjanjabi bw’ebisolo mu district ey’e Ssembabule Dr.Angello Ssali, agambye nti ab’e Ssembabule baamala dda okufuna eddagala ddoozi emitwalo 16, era kibayambye nnyo okufuna akalembereza ku nsaasana y’ekirwadde ekyo mu Kitundu Kyabwe.
Buli kalusu lwabalukawo government essa omuggalo ku kutambuza ebisolo mu bitundu by’eggwanga ebitali bimu okuziyiza okusaasaanya ekirwadde, wabula nekikosa eby’enfuna y’abantu.
District ezizze zisiinga okukosebwa kuliko Mubende, Bukedea, Kumi, Mbarara, Nakaseke, Gomba, Luweero, Isingiro, Kazo, Mityana, Kiruhura, Sembabule n’ebitundu ebirala.
Mu mbeera eno government eyimiriza entambuza y’ebintu byonna ebiva mu nte, omuli amata, amaliba, omuzigo, obusa n’ebirala okusala ku nsasaana y’ekirwadde.
Bisakiddwa: Elisa Nicholas Ssekitende
