Obululu bw’empaka za Stanbic Uganda Cup obw’omutendera gwa ttiimu 32 bukwatiddwa ku kitebe kya FUFA e Mengo mu Kampala, era emipiira ku mutendera guno gigenda kuzanyibwa okuva nga 11 okutuuka nga 28 omwezi guno ogwa February.
Bannantameggwa b’empaka ezasembayo aba BUL akalulu kabasudde ku SC Villa Jogo Salongo abakawangula empaka zino emirundi 9.
KCCA egenda kuzannya n’omuwanguzi wakati wa club ya Gorilla Highlands ne Kataka abakyali ku mutendera gwa ttiimu 64.
Express FC mukwano gw’abangi egenda ku ttunka ne Lugazi mu kisaawe e Wankulukuku, Junior Eagles egenda kuttunka ne Onduparaka, Jinja North United egenda kuttunka ne Vipers, Blacks Power egenda kuzuzumba ne Wakiso Giants n’emipiira emirala.
Rogers Mulindwa omukungu mu FUFA, bw’abadde akulembedde omukolo gw’okukwata obululu buno, agambye nti wabaddewo okusituka mu mutindo naddala eri ttiimu ez’omutendera gwa region era n’asaba ttiimu zonna okwongera okukuuma empisa n’ebiseera.
Bisakiddwa: Issah Kimbugwe
