Bannakibiina kya National Unity Platform nate balidde matereke ne police ye Bundibugyo, bwebadde ebalemesa okukuba olukungaana lwabwe ku Kisaawe kya Booma grounds,nebakugira n’okwogerera ku Radio mu district eno.
Kyagulanyi ne bannakibiina be babadde bagenze Bundibugyo okusaggulira ekibiina obuwagizi, naye police tebaganyizza.
Bijidde mu kiseera nga wakayita wiiki emu ng’abakulira NUP bakatuula mu kafubo n’abakulembeze ba police e Naggulu, nebabaako byebakanyaako.
Police ye Bundibugyo ng’eduumirwa, omusirikale ategerekeseeko erya Wabwire, etegeezezza nti banna kibiina kya NUP, ababade bakulembeddwamu president w’ekibiina wabwe , Robert Kyagulanyi Ssentamu Bobi Wine, baaganye okukwatagana ne police mu kutegeka olukungaana lwabwe, nga nabo babadde tesobola kubakkiriza kukuba lukungaana lwabwe mu kisaawe kye Booma.
Police era etegeezezza abakulira Radio aba NUP kwebabadde baagala okwogerera, nti tebalina kyebamanyi ku kukyala kwabwe ku mukutu guno, era nti babadde sibakukkirizibwa kwogererako.
Basoose kuggulawo wofiisi za NUP e Bundibugyo, era enteekateeka endala awo wezikomye.
Mukwogerako eri bannamawulire e Bundibugyo oluvanyuma lw’okulemesebwa okukuba olukungaana, president w’ekibiina kya NUP, Robert Kyagulanyi Ssentamu Bobi Wine, akukkulumidde police olwokubalemesa enteekateeka zabwe, wadde nga bagezezaako okugoberera ebiragiro byonna ebyabaweereddwa.
Omwogezi wa police Rusoke Kituuma, abalabudde nti ssibakukkirizibwa kubaako kyebakola, ssinga bava ku biragiro ebyabaweebwa mu lukungaana lwebabaddemu wiiki wedde, ku nsonga zeenkungaana zaabwe.#
