Omubaka wa parliament owa Nyendo Mukungwe era nga Commissioner wa parliament Mathias Mpuuga Nsamba alangiridde nti simwetegefu kwabulira kibiina kya National Unity Platform NUP kyeyatandika ne banne abalala mu bwagazi nemukwewayo nekigendererwa eky’okukyusa Uganda.
Mpuuga Nsamba akinogaanyizza nti omulamwa ogwatandiisaawo ekibiina kino tegunaggwa era wakusigala mu kibiina kino ng’atuukiriza ebigendererwa byakyo.
Mpuuga ategeezezza nti ye akyali member mujjuvu nti era abo bonna abagezako okwagala okumusindikirizza okukivamu bali kubyabwe kuba teri muntu yenna asoboola kumugoba mu NUP.
Mathias Mpuuga Nsamba asinzidde mu lukungaana lwabannamawulire ku parliament n’ategeeza nti wadde ebikolwa bingi ebikolebwa okumusindiikiriza okuva mu kibiina kino,n’agamba nti kikafuuwe okukyabulira.
Agambye nti mu bbanga eritali lyawala, wakutandika ku nteekateeka ey’okuzza ekibiina kino ku miramwa emituufu egyakitandiisaawo okuyita mukugyayo ebyo byebalaba ebitatambula bulungi mu kibiina
Mpuuga era azeemu okukkaatiriza nti ssi wakulekulira kifo kyobwa commissioner bwa parliament nti kubanga abamukolokota abamulagira okukivaamu teboogera tteeka lyeyamenya okuweebwa akasiimo olw’emirimu gyeyakola mu kiseera kyeyakuleembera oludda oluvuganya government mu parliament.
Owek.Mathias Mpuuga Nsamba omubaka wa Nyendo Mukungwe
Mpuuga era ategeezezza nti mu bbanga eritali lyewala agenda kwetaba mu mulimu omunene ogwokukyusa enkola y’ekibiina, kireme kutambula mu ngeri yeemu ng’ekibiina kya NRM kyebagala okuggya mu buyinza .
Mpuuga era agamba nti akyalina n’omulimu omunene ogwokugolola ettumba abo bonna abageezako okutwala ekibiina kyabwe ekya NUP nga ekyokusaaga nga batyoboola abakulembeze b’ekibiina n’ekigendererwa eky’okwagala okukisanyawo.
Mpuuga agaseeko nti ekisinga okumweraliikiriza kwekulaba nga kati ate abagala enkyukakyuka ate batandiise okulwanira obukunkumuka wamu n’okutondawo enkaayana ezitalina makulu, mu kaseera kekamu ng’ate ye gwebaagala okuggya mu buyinza.
Mpuuga era asabye banna NUP nabakulembezze ba NUP okulekeraawo okuyingiza Obw’akabaka bwa Buganda mu butakaanya bwabwe ng’abantu.
Mpuuga agambye agambye nti akyalina obuvunaanyizibwa obw’okusisinkana president wa NUP Robert Kyagulanyi Ssentamu okubaako ensonga zeboogeramu.
Mpuuga agambye nti alina ensonga nnyingi zazze awulira president w NUP ng’azoogerera ku mikutu gy’ebymuliziganya ezigenderera okwoleka Mpuuga ng’omuntu omukyamu ennyo, n’agamba nti naye betaaga okwogeramu bombi nga basajja bakulu okubaako kyebakanyaako.
