Club ya Manchester United eya Bungereza erangiridde eyaliko omuzannyi ku ttiimu eno Ssalongo Darren Fletcher nga omutendesi ow’ekiseera oluvanyuma lw’okugoba abadde omutendesi Ruben Amorim.
Manchester United efuumudde munnansi wa Portugal Ruben Amorim ku mulimu oluvanyuma lw’ebbanga lya myezi 14 gyokka.
Ruben Amorim agenze okugobwa ku mulimu guno, nga yakamala okwogera ebigambo abikaawa nga omususa, nga yemulugunya olw’abakulu okuyingirira emirimu gye, ate n’obutatuukiriza ebyakanyizibwako mu ndagaano ye.
Kakaano Darren Fletcher agenda kutendeka Manchester United okutuuka kunnkomerero ya season eno, era agenda kutandika n’omupiira nga Manchester United ng’ettunka ne Burnley ku lw’okusatu nga 07 January,2026.
Darren Fletcher abadde akolanga technical director ku Manchester wakati wa 2021 okutuuka 2024.
Fletcher era yazannyirako Manchester United okuva 2002 okutuuka 2015.
Bisakiddwa: Isah Kimbugwe
