Omukulembeze w’ekibiina kya National Unity Platform Robert Kyagulanyi Ssentamu ategezeza nga ekibiina kyakulembera bwekyetegese obulungi okutwala obukulembeze bwa Uganda, baleete n’enkyukakyuka ey’omuggundu.
Kyagulanyi Ssentamu asinzidde ku kitebe kya NUP e Makerere Kavule, ng’ekibiina kino kitongoza manifesito yakyo eriko ennyiingo 11, eri e ggwanga.
Ezimu ku nsonga ezissiddwako essira kwekukuuma ssemateeka wa Uganda, obwenkanya, okulwanyisa ekibba ttaka n’ekisengula bantu, enguzi, eddembe ly’obuntu, okusitula obuweereza bwa government ez’ebitundu n’ebirala.
Agambye nti ng’ekibiina bakoze kyebasobola okuzimba emisingi egyisobola okukyuusa eggwanga, nga kati bannansi bebalina okwegatta mu lutabaalo luno.
Kyagulanyi akuutidde bonna abakwasiddwa kaadi z’ekibiina ku mitendera egyenjawulo okubunyisa enjiri ya Manifesito eno nga banoonya akalulu, banansi basobole okujitegeera obulungi
Kyagulanyi era ajjukiza abakwatidde eNUP bendera ku mitendera egyenjawulo nti obudde bwonna government yandiggyako internet mu ggwanga okulonda nga kutuuse, nga bwegwali mu 2021, nabasaba bafune abantu bebesiga abagenda okukuuma akalulu kabwe baleme kwekwasa nti babbiddwa.#
