Kyadaaki Abasomesa naddala abasomesa amasomo ga Arts abegattira mu kibiina kyabwe ekya Uganda National Teachers Union (UNATU) bayimirizza akediimo kaabwe akabadde kamaze omwezi mulamba, nga bagala government eboongeze omusaala nga bweyakola kusomesa science.
Abasomesa ba Arts bazze bekubira enduulunga bagamba nti tekyali kyabwenkanya government okwongera emisaala gy’abasomesa Science okutuuka ku bukadde buna buli mwezi, aba Arts nebasigala nga basasulwa omusaala oguli mu kakadde kamu aka shilling.
Abasomesa bano bazzenga basisinkana ebitongole bya gavumenti ebyenjawulo ku nsonga eno, naye nga government ebasuubiza nti nabo yakubakolako mu mbalirira y’omwaka gw’ebyensimbi ogujja.
Mu lukungaana lwa bannamawulire lwebatuuzizza ku kitebe kyabwe mu Kampala, Ssaabawandiisi wa UNATU, Filbert Baguma asoose kubasomera ebiwandiiko ebisaba abasomesa okuddayo mu bibiina nga bwebakola ku nsonga zaabwe, era naabasomera nekiwandiiko ekiraga nga sipiika wa Parliament Anitah Annet Among bweyayise obukiiko bwa parliament okutunula mu nsonga zino.
Wabula kino kitaanudde abasomesa nebatabuka nga baagala parliaament esooke ekole ku nsonga zaabwe, olwo balyooke bayimirize akediimo.
Olukungaana luno lwetabiddwamu n’ababaka b’abakozi mu parkiament era wano omubaka Charles Bakabulindi, Agnes Kunihira ne Arinaitwe Rwakajala bagezezaako okuboogereza okudda mu bibiina nga buteerere.
Gyebigweredde nga bano bakiriziganyizza okuyimirizza akediimo kaabwe nga bwebalinda parliament kyenaasalawo.
Ssaabawandiisi wa UNATU Filbert Baguma agamba nti ekyokuyimiriza akediimo kano kigendereddwamu okuwa government akaseera okukola ku nsonga zaabwe.
Bisakiddwa: Edithie Nabagereka
