Essomero Kings College Budo liwezezza emyaka 120 okuva weryatandikibwawo mu mwaka 1906, era nga lisangibwa ku kasozi Buddo mu district ye Wakiso.
Mukusooka teryaali lya bantu ba bulijjo, okusinga lyali likozesebwa Okusomesa Abalangira , Abambejja n’Abantu ab’enkizo mu ggwanga, nga lyali liddukanyizibwa ku musinji gw’Ekkanisa ya Uganda.
Henry Walter Weatherhead ye mukulu w’Essomero lya Kings College Budo eyasookera ddala, era werutuukidde leero ng’essomero lino lyakafuna abalikulira 15.
Omukulu w’Essomero lya Kings College Buddo Godfrey Kasamba nga entebe eno yakagimalamu wiiki bbiri zokka era nga yazze mu bigere bya Canon Fred Kazibwe, yeebazizza nnyo Canon Fred Kazibwe olwebirungi byakoze ku ssomero lino, ne bakulu be bonna mu buweereza.
Canon Fred Kazibwe nga yaabadde omukulu wessomero lya Kings College Budo eyawummudde, ategeezezza nti obubbi bw’Ettaka bukyaali kizibu kinene eri Amasomero, naasaba ensonga eyo erowozebweko.
Omumyuka w’Omukulembeze w’Eggwanga Rtd Maj Jessica Alupo yeebazizza Obwakabaka bwa Buganda olw’Okukulemberamu kaweefube w’Okutumbula Ebyenjigiriza, nga buyita mu kutandikawo masomero n’Okukwasizaako amalala okufuna ettaka okusomesa abaana b’Eggwanga.
Bwabadde yeetabye ku kijaguzo ky’Emyaka 120 essomero Kings College Budo bukyanga litandikibwawo ku Kasozi Buddo, Rt Maj Jessica Alupo agambye nti essomero lino likyaali kyakulabirako kinene eri Obukulembeze ku mitendera egyenjawulo mu Uganda, ne mu buweereza bungi ddala.
Jessica Alupo ategeezezza nti essomero Kings College Budo libadde ssaale mu kufulumya Abayizi abalimu ensa, abalumirirwa abalala ate nga balina Omwoyo gw’Eggwanga.
Omulabirizi we Namirembe Kitaffe mu Katonda Moses Bbanja yakulembeddemu ebijaguzo eby’emyaka 120, agambye nti Ettoffaali eryassibwawo Ssekabaka Daudi Chwa II ne Ssaabasajja Ronald Mutebi II ku ssomero lino ddene ebitagambika, omuli n’Okukwasizaako amasomero agatalina buyambi bumala.
Omulabirizi Bbanja mungeri eyenjawulo asabye ebikolwa by’Obulyaake bikomezebwe mu buweereza obwenjawulo, kuba bufiiriza eggwanga.
Minister avunaanyizibwa ku bizimbe n’Ettaka mu Bwakabaka Owek David Fredrick Mpanga nga yoomu ku bayizi abaasomerako ku ssomero lya Kings College Budo, aweereddwa Ejjinja eriweebwa Abayizi olw’ebirungi byebakoledde ensi yaabwe ategeezezza nti ebibala bye kitundu ku Bwakabaka , era neyeeyama okukuuma Omutindo gw’Obuweereza.
Mu mbeera yeemu Norah Namakula Muyinda Omu ku bayizi abawala abaasooka okusomera mu Kings College Budo nga kati alina emyaka 104, naye aweereddwa ejjinja erimusiima, agambye nti Abawala okugenda mu masomero kiyambyeko nnyo mu nkulaakulana y’Eggwanga.
Bisakiddwa: Kato Denis
