Katikkiro wa Buganda Charles Peter Mayiga atongozza enteekateeka y’okusomesa abantu okulwanyisa obubenje bwokunguudo, etuumiddwa Labuka Tofiira ku kkubo, ku kyeggulo kya Kaliisoliiso ekiyindidde ku hotel Africana mu Kampala.
Katikkiro aagambye nti enkozesa y’Enguudo etali ya buvunaanyizibwa yesinze okuviirako Obubenje okutugira bannansi ku makubo.
Enteekateeka eno ezingiddemu kaweefube agenda mu maaso ow’okusonda ensimbi ez’okuzimba ekifo ku ddwaliro lya Nkozi Hospital awanaajjanjabibwa abagudde ku bubenje.
Yawomwamu omutwe CBS radio okuyita mu ppulogulamu ya Kaliisoliiso eweerezebwa ku mukutu gwa 88.8, okuva ku Monday okutuuka ku Friday, ku ssaawa emu n’ekitundu okutuuka ku bbiri ezokumakya.
Katikkiro mungeri eyenjawulo atenderezza abaweereza ku CBS naddala Banna Kalisoliiso abakulemberwa Hajji Abbey Mukiibi Nkaaga ,Hajji Abbu Kawenja, Peace Diane ne Kanaakukya Rajab abaatandikawo kaweefube w’Okusonda ensimbi okukwasizaako ennteekateeka ez’enjawulo okukyusa obulamu bwa bannauganda.
Omumyuuka owookubiri owa Katikkiro era nga ye Ssentebe e’Entekateeka ya Kalisoliiso Dinner ku lw’Obwakabaka ne Banna Rotary, agambye nti Omulimu gw’Okusonda ensimbi gwongedde okuwa essuubi.
Ssenkulu wa CBS Omuk Michael Kawooya Mwebe agambye nti eddimu CBS lyeyekwaata Okukunga abantu okusonda ensimbi bazimbe awajjanjabirwa abagudde ku bubenje kabonero akokwagala eggwanga Uganda n’Okulirumirirwa.
Ssenkulu wa MTN Uganda Sylvia Mulinge ng’obubakabwe busomeddwa Omuk Andrew Bugembe, beeyamye Okwongera obuvujjirizi ku nsonga y’Okulwanyisa Obubenje, era ng’ Obukadde bwa shs 520 bwebussiddwa ku nteekateeka eno.
Beatrice Lugalambi Omuk mu Centenary bank ku lwa ssenkulu Fabian Kasi, agambye nti ku Bukadde obukunukkiriza mu 150 obwassibwa ku ddwaliro, Centenary bank egenda kwongerako Obukadde 280.
District Govnor 9213 Munna Rotary George Kitaakule agambye nti tebagenda kussa Mukono okulaba nga buli kikozesebwa okutaasa Obulamu weekiri.
Akulira eddwaaliro lya Nkozi hospital Dr Crisent Tumuhaise agambye nti bingi ebyongedde okukyuka ku ddwaliro e Nkozi, neyeebaza CBS olw’okukulemberamu Omulimu guno.
Abantu ba Kabaka abeetabye mu Kalisoliiso dinner bagegeenyezza ebintu ebyenjawulo ebikolebwa mu Kaliisoliiso Dinner, ddala okuleet Mmoto z’amaka ezisesezza ennyo abantu, olw’engeri gyezibadde zinnyonyolamu enneyisa y’abakyala n’abakazi.
Afrigo Band, abayimbi kinnoomu ne bannakatemba nabo basanyusizza abantu abetabye ku kyeggulo kino, eby’okulya n’okunywa nabyo bibadde ttomooni.
Bisakiddwa: Kato Denis
Ebifaananyi bya: MK Musa
