Government ya Uganda eyagala eyagala okussa ekkomo ku by’amaguzi byonna ebifuluma Uganda nga tebitagattiddwako mutindo, nti okusobozesa eggwanga okufunamu ekisanidde mu byamaguzi byayo.
Mu nteekateeka eno government esabye bamusiga nsimbi okuva mu United Arab Emirates, (UAE), okwongera amaanyi n’okujikwasizaako mu kutondawo amakolero, n’okubangula banna Uganda ku ngeri y’okutumbula omutindo ku byamaguzi.
Eno yeemu ku nkola esuubirwa okuyambako mu kulwanyisa ebbula ly’emirimu n’okwongera okulinnyisa ebyenfuna bya Uganda.
Bino bituukiddwako mu lukuηaana olwa bamusiga nsimbi olwatumiddwa UAE- Kenya- Uganda Trade Mission East Africa, oluyindidde ku Sheraton Hotel mu Kampala.
Mubaddemu okukubaganya ebirowoozo ku ngeri y’okutumbula ebyensubulagana wakati wa mawanga ga East Africa naagali mu kyondo kya Buwalabu.
Olukungaana luno lwetabiddwamu abakungu okuva mu mawanga agenjawulo, banneekolera gyange, abakulembeze b’ebitongole bya government ebivunaanyizibwa ku byamakolero n’obusuubuzi nabalala.
Bwabadde aggulawo olukungaana luno, minister omubeezi avunanyizibwa ku makolero, obusuubuzi n’obwegassi Gen. Wilson Mbasu Mbadi, agambye nti Uganda essira kati eriteeka ku basiga nsimbi abasobola okuleeta enkulakulana mu Uganda, okusiga amakolero n’okugatta omutindo ku biruubirira okuwa banna Uganda emirimu n’okusitula ebyenfuna bya Uganda.
H.E Abdullah Sultan Al-Owais, ssentebe w’olukiiko olufuzi olw’ekitongole kya Sharjah Chamber of Commerce and Industry okuva mu United Arab Emirates, (UAE), agambye nti okuva mu mwaka gwa 2015, basize ensimbi mu byenfuna bya Uganda omuli n’okuzimba ekisaawe ky’ennyonyi ekyomutindo mu bitundu bye Kidepo mu bendobendo lye Karamoja, okusobozesa ebyensubulagana okweyongera.
Rosa Malango, omubaka wa president owenjawulo avunanyizibwa ku kutumbula ebyobulambuzi n’ebyobusuubuzi bya Uganda, asabye bamusiga nsimbi okwongera okuvujjirira ebyobulambuzi bya Uganda, n’okwongera enkolagana wakati w’amawanga.
Rita Nabateregga Mugula, amyuka ssenkulu w’ekitongole ekivunanyizibwa ku kusiga ensimbi ekya Uganda Investment Authority, agambye nti ebyamaguzi okuli emmwanyi, zzaabu, Amajaani, n’ebyennyanja, byebimu ku bikyasinze okusuubuzibwa okuva e Uganda okugenda mu UAE.
Bisakiddwa: Ddungu Davis
