Government okuyita mu ministry y’ebyensimbi n’okuteekerateekera eggwanga eweerezza ensimbi trillion 9 n’obuwumbi 195 eri ebitongole byayo, okutambuza emirimu mu ttunduttundu eryokubiri ery’omwaka gw’ebyensimbi 2023/2024.
Ku trillion 9 ezifulumiziddwa, trillion 1 n’obuwumbi 824 zigenda kusasula misaala gy’abakozi ba government egy’ekitundu ky’omwaka ekyatandise mu October 2023 okutuuka mu January 2024.
Obuwumbi 434 ziwerezeddwa mu bitongole by’ebyokwerinda okuli amaggye, Police ne ISO; amaggye gatutteko obuwumbi 217, Police efunyeeko obuwumbi 78, ekitongole ky’amakomera kifunyeeko obuwumbi 91 songa ISO ne ESO bifunye obuwumbi 46.
Parliament ewereddwa obuwumbi 212, akakiiko kebyobukulonda obuwumbi 97, ate essiga eddamuzi liweereddwa obuwumbi 60.
Obuwumbi 289 zigenda kusasula akasiimo kaabakozi okuli pension ne Gratuity, songa obuwumbi 221 ziweereddwa ministry y’ebyenjigiriza n’emizannyo nga kuliko obuwumbi 84 ezokugula ebikozesebwa mu masomero ebiyambako abayizi okusoma.
UNEB egenda kufuna obuwumbi 23 ezokuteekateeka ebigezo byakamalirizo eby’omwaka guno 2023, so nga obuwumbi 108 ziwereddwa University za government.
Ramathan Goobi omuteesiteesi omukulu mu ministry y’ebyensimbi era avunaanyizibwa ku ggwanika ly’eggwanga agambye nti obuwumbi 240 ziweereddwa ekitongole ky’eggwanga ekigula n’okutambuza eddagala mu malwaliro ga government ki National medical stores.
Ekitongole ky’eggwanga eky’ebibalo, kifunye obuwumbi 158 okuteekateeka okubala abantu omwaka oguggya 2024, so nga obuwumbi 156 ziweereddwa ekitongole kya Road fund ziweerezebwe mu government ez’ebitundu okulima enguudo.
Obuwumbi 57 ziweereddwa ebitongole okuli NAADS , UCDA ne NARO okugula ensigo okuteekateeka okusiga.
Obuwumbi 21 ziweereddwa ekitongole ky’eggwanga eky’ennyonyi so nga obuwumbi 15 ziweereddwa akakiiko k’eggwanga ekebyemizannyo ka National council of sports ziweebwe federation z’ebyemizannyo.#