Ekibiina ekiddukanya omupiira mu Uganda ki FUFA kyongezayo endagaano y’omutendesi wa ttiimu y’eggwanga eya Uganda Cranes, Paul Joseph Put, ebbanga eddala lya myaka 2 n’ekitundu nga addukanya ttiimu eno.
Birangiridwa akulira eby’emirimu mu FUFA, Edgar Watson mu lukuηaana lwa bannamawulire olutudde ku kisaawe kya FUFA ku Kadiba e Mengo.
Omutendesi Paul Joseph Put akinogaanyizza nti mwetegefu okutwala Uganda Cranes ku mutendera oguddako, kyokka olw’ekitiibwa bonna abakwatibwako omupiira gwa Uganda kye bamulaze, bye bimu ku bimuwadde amaanyi okwongezaayo endagaano eno.
Joseph Put yegatta ku Uganda Cranes mu November wa 2023, era mu bbanga eryo ayambyeko Uganda okukiika mu mpaka za AFCON 2025 ate n’okukola obulungi mu mpaka za FIFA World Cup Qualifiers eza 2026.
Yakatendeka Uganda emipiira 23, awanguddeko 13, agudde amaliri ga mipiira 3 ate akubiddwa emipiira 7, atebeddemu goolo 30 ate nateebwamu goolo 24.
Bisakiddwa: Isah Kimbugwe
