Ekibiina ekiddukanya omupiira mu Uganda ekya FUFA nga bakolaganira wamu n’olukiiko oluddukanya liigi ya babinywera eya Uganda Premier League, bakoze enkyukakyuka munsengeka y’emipiira egigenda okuggulawo liigi empya eya 2025/26, egenda okutandika nga 26 omwezi guno ogw’omwenda.
Munkyukakyuka zino empya ekisaawe kye Namboole kigenda kutegeka emipiira eginaazanyibwa nga 04 October, nga Kitara FC ettunka ne Vipers ku saawa 10 ez’olweggulo, ne Villa Jogo Ssalongo ng’ettunka ne KCCA ku ssaawa 2 ez’ekiro.
Wadde Namboole yaggaddwa okwongera okumuddaabiriza n’okumugaziya mukwetegekera AFCON wa 2027, FUFA etegeezezza nti ekisaawe kye Namboole eky’ebweru kye kijja okukozesebwa okutegeka emipiira gino.
Emipiira egigenda okuggulawo liigi nga 26 omwezi guno ogwa September, kuliko BUL egenda okuttunka ne URA mu kisaawe kya FUFA Technical Center e Njeru.
UPPC egenda kuzannya ne Buhimba United ku kisaawe kya Bugonga Fisheries e Ntebe, Kitara yakuzannya ne KCCA ku The Royal Park Butema e Hoima.
Lugazi yakuzannya ne Calvary e Lugazi, Police yakuzannya ne Mbarara City ku Kira Road Police Arena e Kamwokya ate nga Express mukwano gwabangi ne UPDF e Nakivubo.
Emipiira 2 okuli ogwa Maroons ng’ettunka ne NEC e Luzira, ne Vipers ng’ettunka ne Villa Jogo Ssalongo e Kitende gya kulindamu, olwa club ya Vipers ne NEC ezeetegekera emipiira mu mpaka za Africa eza CAF Champions League ne CAF Confederations Cup.
Wadde liigi eno etandika nga 26 September,2025, naye wakyaliwo okusika omugwa ku nzannya empya eya liigi eyaleteddwa.
Club 3 okuli Vipers, NEC ne Villa Jogo Ssalongo zikyeremye nga zigamba nti sinetegefu kuzannyira mu nzannya empya.
Enzannya eno empya egamba nti club zonna zakuvuganyiza mu round 3 era ng’emipiira 268 gyegisuubirwa okuzannyibwa, okuva ku nzannya ey’okukyaliragana ebaddewo.
Bisakiddwa: Isah Kimbugwe
