Ekibiina ekiddukanya omupiira mu Uganda ekya FUFA, mu butongole kirangiridde Fred Muhumuza ng’omumyuka w’omutendesi ow’okuntikko owa ttiimu y’eggwanga eya Uganda Cranes.
Omumyuka owokungikko ye Paul Joseph Put.
Fred Muhumuza azze mu bigere bya Omulangira Sam Ssimbwa Bamweyana, oluvannyuma lwa FUFA obutazza buggya ndagaano ye.
Omulangira Sam Ssimbwa Bamweyana yalondedwa okumyuka Joseph Paul Put mu November wa 2023.
Endagaano ya Put yaziddwa bugya ebbanga eddala lya myaka 2 n’ekitundu wabula Sam Ssimbwa naasuulibwa ettale.
Kakaano Fred Muhumuza abadde mutendesi ku club ya Vipers eya Uganda Premier League era nga nayo abadde mumyuka w’omutendesi owokuntikko.
Wabula oluvanyuma lw’okufuna omulimu guno kati abeera takyakkirizibwa kuwambagatanya mirimu mirala okusinzira ku tteeka erifuga abatendesi ba Uganda Cranes.
Fred Muhumuza ajjukirwa nnyo okukolera ewamu ne John Luyinda Ayala okuwangulira Vipers ebikopo 2 season ewedde eya 2024/2025 okuli ne Uganda Premier League ne Uganda Cup.
Muhumuza era yabadde wamu ne Morley Byekwaso okuyambako Uganda Cranes okutuuka ku quaterfinal mu mpaka za CHAN ezaali wano mu Uganda.
Fred Muhumuza mu kiseera kino ali ne Uganda Cranes eyagenze e Morocco okukubayo enkambi okwongera okwetegekera empaka za Africa Cup of Nations ezitandika nga 21 December,2025 e Morocco.
Bisakiddwa: Isah Kimbugwe
