Tiimu ya Uganda ey’omupiira ogw’ebigere eyabazannyi abatasussa myaka 17 egy’obukulu eya Uganda Cubs egenda kuttunka ne Burkina Faso ku mutendera gwa ttiimu 16,mu mpaka z’ensi yonna eza FIFA U17 World Cup eziyindira e Doha Qatar.
Uganda eyongedde okukola ekyafaayo mu mpaka zino bweyesoze omutendera gwa ttiimu 16 oluvanyuma lw’okumegga Senegal ku goolo 1-0 eteebeddwa Abubakali Walusimbi mu kitundu ekisooka.
Uganda nga empaka zino yazetabyemu omulundi gwayo ogusooka, kati ku mutendera gwa ttiimu 16 egenda kuttunka Burkina Faso, nga Burkina Faso nayo okutuuka wano ewanduddemu Germany ku goolo 1-0.
Wadde Uganda ewangudde omupiira guno, naye Senegal etaddewo omutindo ogwenjawulo era omukwasi wa goolo ya Uganda Edrisah Waibi ataddewo omutindo ogwenjawulo.
Uganda Cubs kati mu mpaka zino yakawangula emipiira 2, nga ogwasooka gwali gwa kibinja mweyakubira France goolo 1-0.
Omutendesi wa Uganda Cubs, Brian Ssenyondo yatwala ttiimu yabazannyi 21 okuvuganya mu mpaka zino.
Bisakiddwa: Isah Kimbugwe
