Entiisa ebuutikidde abatuuze be Katonto mu district ye Rakai Envubu bwerumyeeko abantu 4 amagulu nebaddusibwa mu malwaniro nga bali mu mbeera mbi, ate omu afudde.
Kigambibwa nti Envubu eno yandiba nga yavudde mu Nyanja Kijjanabalola negoba ku lukalu, olwo netaandika okwonoona ebirime by’abatuuze.
Abamu ku bannabwe basazeewo okuyita police egikwate, wabula nebategeeza nti yo ebadde terina busobozi bugikwata, nga babadde balina kulinda ab’ekitongole ky’ebisolo byomuttale.
Abamu ku batuuze basazeewo okwekolamu omulimu nebagifumita amafumu negwa wansi, bagezezaako okugisiba emigwa kwekutabuka n’ebeefuulira nebaluma, 4 ebakutuddeko amagulu ate omu emusse.
Abantu abawerako babadde bakungaanye okugiraba nga balowooza amaanyi gagiwedde, wabula bwetabuse bonna nebabuna emiwabo, era abalala bafunye ebisago n’okwerinnya linnya.
Abatuuze abalabideko nagabwe bagamba nti obukambwe bwebalabye ku nvubu eno tebabulabangako.
Bisakiddwa: Lukenge Sharif
