Mu Program Entanda ya Buganda nga 14 October,2024 ku CBS 88.8 Ey’obujjaja, abamegganyi Kafeero Paul eyafunye obugoba 23 ne Nsobya George William eyafunye obugoba 20 basuumusiddwa okweyongerayo mu lumeggana oluddirira, ate Ssemmanda Joel eyafunye obugoba 13 awanduse.
Biibino ebibuuzo by’Entanda;
1. Tuwe erinnya eddala eriyitibwa omuti gwa Kiwanuka. …..Omuserere.
2. Ennyumba ya Ppookino omwami afuga essaza Buddu eyitibwa etya?….. Buddukiro.
3. Olugero: Nnaakuddamu ntya jjo…….Bwakukwata takuta.
4. Amakulu ga mirundi ebiri ag’ekigambo okwalika…… Okumazaawo ebintu by’obadde olina, n’okumazaawo empiki ssinga oba obadde oyesa omweso.
5. Omwaka ekitundu ky’e Kkooki mwekyafuulirwa essaza lya Buganda…… 1894
6. Erinnya lya Kabaka eyawangula essaza Buddu…… Ssekabaka Jjunju.
7. Omuzizo omukulu ku nswa enkulu. ….Teziriibwa.
8. Amannya ag’obuntu og’omwami afuga essaza Buweekula…….Owek. Andrew Ssempijja Mukasa.
9. Omuntu atamanyi kimera ekiyitibwa Engabo y’ekyalo ogimunnyonnyola otya n’akitegeera?….. Ebyalibadde ebikoola byakwo bijjuddeko maggwa ate nga bigumu nnyo.
10. Erinnya ly’ennyumba ya Katambala omwami atwala essaza Butambala. ….Mayembe.
11. Olugero: Mpa magombe gazza….. Ng’embuzi eruma weesula.
12. Amakulu ga mirundi ebiri ag’ekigambo Okwebegera….. Okunywa ku mwenge nga tonnabaako mulala gw’owaako n’omukazi bwaba abega emmere asooka neyeebegera n’alyoka abegera abalala.
13. Kkooki, limu ku masaza ga Buganda, Kamuswaga ki eyakola endagaano nerifuuka essaza lya Buganda? ….Keezeekia Ndawula.
14. Kabaka eyawangula essaza Butambala….. Ssekabaka Kateregga.
15. Enswa ensiru ozaawula otya ku nswa endala?….. Enswa ezibuuka mu nkuba.
16. Tuwe amannya ag’obuntu ag’omwami afuga essaza Buluuli. ……Owek. Robert Ssonko.
17. Erinnya eddala ery’omuti oguyitibwa Omwerura…. Omusambya.
18. Ennyumba y’Omwami afuga essaza Ssingo yaweebwa linnya ki?…. Matutuma.
19. Olugero: Obukojja bwamunno… sibubwo.
20. Amakulu ga mirundi ebiri ag’ekigambo okwanula…… Ekikolwa ekyokuggya omwami mu maaso ga Kakaba bwaba azze okweyanza obwami n’okulayira omulundi ogusooka, wamu n’okuggya ebintu mu luggya ebiba byanikiddwa.
21. Amannya ga Kabaka wa Buganda eyakola endagaano eyagatta ekitundu ekiyitibwa Kkooki ku Buganda? …..Ssekabaka Mwanga II
22. Tuwe Kabaka wa Buganda eyawangula essaza Buweekula. ……Kabaka Kamaanya.
23. Waliwo enswa abaganda ze bayita ensiru, tuwe erinnya lyazo eddala? ….Embaala.
24. Amannya ag’obuntu ag’omwami afuga essaza Buvuma. ….Owek. Michael Wamala Mboowa.
25. Ku mbizzi kuliko ekitundu kyebayita ekigalabi, kyekiriwa?……Ekitundu ekitwaliko omumwa n’ennyindo.
26. Olugero: Ennyumba kibira……Tegeyerwamu muntu.
27. Olulagala olutanneeyanjuluza nga lwerusoose ku kitooke luweebwa linnya ki?…… Olugemo.
28. Eryato ly’okumazzi teritambula, likola ki?…. Liseeyeeya.
29. Ekisoko Okuba ebule n’ebweya kitegeeza ki? Okuba nga waliwo ebbanga eryesudde ku bintu ebibiri.
30. Ekika ky’Abaganda ekirina Obutaka bwakyo e Kambugu mu Busiro. ….Njovu.
31. Omukeeka ogusinga obwangu okulukwa…..Kyaki.
32. Akakwate wakati wa Kibuuka Omumbaale ne Nalwoga…… Oyo ye nnyina omuto owa Kibuuka Omumbaale.
33. Olugero… Nnaasiwa mu kange… Asiwa mu kaabukuku.
34. Kabaka eyadibya empisa ya Nnamasole obutaddayo kulaba ku Kabaka…… Ssuuna II
35. Okufuuka Omusu gw’e Kanyanya kisoko kitegeeza ki?…… Kwekugenda awantu nga bakusuubira okudda naye n’osulayo.
36. Kizira okutega ekinyonyi kino, bwokitega olwala? Kinyonyi ki?…. Ngaali.
37. Tetugamba nti Omumbejja afunye olubuto, tugamba tutya?……. Nti Omumbejja muzito.
38. Tubuulire omuzaana eyasongoleranga Ssekabaka Nnakibinge emmuli bweyalinga mu lutabaalo…… Nannono.
39. Kkoyi kkoyi: Ku ngulu nnyama munda mucuuzi…… Ennyaanya.
40. Omutaka akuuma ekiwu kya Kabaka aba wa Kika ki?…. Lugave.
41. Akasanke nako kaba n’ekifuba, kiyitibwa kitya? …… Emmanda.
42. Olugero: Anaakutiisa embuga… …Nti omwami yeesaze akajegere.
43. Kabaka alina amannya ag’ekitiibwa okugeza Ssemanda, liggwayo litya?…… Ssemanda agamenya embazzi n’okuyunga.
44. Waliwo omuzaana eyakuuma Obuganda nga bba abuze, yaweebwa linnya ki olw’ekikolwa ekyo? …. Nnabulya.
45. Omuntu bwakugamba nti ebintu byo babitadde ku w’e Misindye, Ow’e Misindye yaani? …..Nnamutwe.
Bitegekeddwa Kamulegeya Achileo. K