Abasawo abegattira mu kibiina ekya Uganda Medical Association (UMA), beekubidde enduulu eri abakulira ministry y’ebyobulamu ku kusoomozebwa kwebayitamu oluvannyuma lwa government okuyimiriza okuwa ensako eri bannabwe ababeera bakyagezesebwa mu malwaliro.
Abasawo bano benyamivu nga bagamba banabwe abakyagezesebwa n’okukuguka mu busawo, olw’okusalibwako ensimbi zebabadde bafuna okuva mu government nga zino zibadde zibayambako okwebezawo nga bakola emirimu, kyandikosa obuweereza bw’amalwaliro gyebakola.
Nga bakulembeddwamu Associate Prof. Dr. Frank Asiimwe, amyuuka president w’ekibiina omwegattira abasawo ekya UMA, agambye nti baafuna ekiwandiiko okuva eri ministry y’eby’obulamu nti ensimbi zaabasawo zino zaasaliddwa era ssibakuddamu kuzifuna, kyebawakanya nti sikyabwenkanya.
Government ali yakaanya n’abasawo nti basasulwe ensako ya bukadde 2 n’ekitundu nga bwebakaanya ne president Museveni gyebuvuddeko bwebaali mu kwediima, kyokka oluvanyuma ministry neebagamba nti ssente tezirina era esobola kubanonyezaayo wakiri akakadde kamu kokka, nti ate nazo zajiddwawo ekibatabudde.
Mu nsisinkano naakulira ebyobujjanjabi ebyekikugu mu ministry yeebyobulamu, omumyuka wa president w’abasawo, Associate Prof Dr. Asiimwe, ategezezza nti abasawo ku mutendera guno, bakola kinene nnyo mu kujjanjjaba abalwadde, era nga ebiseera ebisinga bebatukibwako abalwadde mu malwaliro nga naabakugu tebanabatuukako.
Dr. Lubega Robert, akulira abasawo abaamala okusoma naye nebaddayo okukuguka abayitibwa ba Senior House Officers, (SHOs), agamba nti abasawo abasoba mu 300, bebakosebwa embeera eno, era nti abakulu mu ministry yeebyobulamu baabasuubizza okubawa amawulire amalungi ng’omwezi guno ogwa October nga tegunaggwako.
Agambye nti kyenyamiza omusawo agezesebwa okuba nti alina okupangisa waasula kuba tebaweebwa bisulo, okwegulira emmere, ebyentambula nebirala naye nga balina okukola obuwereza obubasuubirwamu mu malwaliro ga govermment sso nga bakolera mu bugubi ate nebakola ne saawa mpanvu.
Wabula Dr. Daniel Kyabayinze, director mu ministry yeebyobulamu avunanyizibwa ku byobujjajabi ebitali byamumalwaliro, ategeeza nti tebayinza kuba nansimbi nebagaana okuziwa abasawo kuba baamugaso, nti wabula teziriiwo.
Bisakiddwa: Ddungu Davis
