Abayizi ba P.7 batandise ebibuuzo bya UNEB 2025 ,bakeeredde mu bibuuzo eby’akamalirizo ebya PLE (Primary Leaving Examinations) ebigenda okubasaza omutendera gwa primary okugenda ku mutendera gwa secondary omwaka ogujja 2026.
Batandikidde mu kibuuzo eky’okubala ku makya, olw’eggulo bakole olupapula lwa SST.
Ku Tuesday nga 04 November, 2025 baakukeerera mu lupapula lwa science olw’eggulo bakole olupapula lw’oluzungu.
Abayizi emitwalo 817,000 bebewandiisa okukola ebibuuzo bya PLE 2025.
Ekitongole kya UNEB kyakakasa ebifo 16,000 mwebagenda okutuulira ebibuuzo okwetoloola eggwanga lyonna.
Akulira ekitongole ekivunanyizibwa ku bibuuzo ekya UNEB, Dan Odongo, asabye abakwatibwako ensonga mu government ez’ebitundu okukolagana obulungi n’ekitongole kya UNEB, okusobozesa entambuza yeebibuuzo okugenda obulungi.
Police mu district ye Lira ekutte abantu 3 abateeberezebwa okugezaako okugulirira akuuma ebigezo.
Abakwate kuliko Odongo George, nnyini ssomero lya Atura Community Day Primary School, Ekut Simon naye yaliko omusomesa mu ssomero lye limu, ne Awoko Lavoiser omusomesa ku St. Gracious Primary School, Barapwo, Lira City West Division.
Kigambibwa nti abasatu bano baliko omukuumi w’ebibuuzo bya PLE geebabadde bagezaako okuperereza ababbire ebigezo bya PLE, era nga babadde bamusuubizza okumuwa akakadde ka shilling kalamba (shs 1000,000).
Bisakiddwa: Ddungu Davis
