Ekitundu kye Kigezi mu bukiika ddyo bwa Uganda kizuuliddwa nti kyekikutte engule y’ebikolwa eby’okusobya ku baana nebabawereba ekirwadde kyamukenenya.
Okunonyereza kuno kufulumidde mu alipoota y’akakiiko k’eggwanga akalwanirira eddembe ly’obuntu ey’omulundi ogwa 26.
Alipoota eno eraga nti okunoonyereza okwakolebwa akakiiko kano, kwazuula nti mu mwaka 2023, emisango 110 egyokujjula ebitanaggya ate nebabasiiga ne siriimu gyegyaawaabwa.
District ezinokoddwaayo mu kitundu kino ekye Kigezi, ebikolwa eby’okusobya ku baana nebawalagibwa ekirwadde kya mukenenya kuliko Kabale, Kannungu, Rukiga, Rukungiri ne Kisoro
Wabula okutwaaliza wamu district ye Kamuli mu Busoga yekyakutte ekisooka mu bikolwa ebyabasajja n’abakazi ba ssedduvutto abajjula ebitanaggya mu ggwanga lyonna.
District eno eye Kamuli, alipoota eraze nti emisango gy’okusobya ku baana egyawaabwa mu mwaka 2023, gyaali 174, yaddiridwa district ye Kiryandongo n’emisango 151, songa district ye Bududa emisango 142, mu district ye Budaka emisango 130 gyegyaawaabwa
Mu Buganda ,ekitundu kye Katwe mu Kampala kyekyaasinga okubaamu ebikolwa ebyokujjula ebitanaggya n’emisango 130 egyaawaaabwa.
Alipoota y’akakiiko k’eddrmbe ly’obuntu ekwatagana ne alipoota ya police ekwata ku buzzi bw’emisango ey’omwaka 2023, eyayoleka nti mu mwaka 2023, police yakungaanya emisango 13,144 egyokusobya ku baana, nga ku baaana abasobezebwaako mu mwaka ogwo 2023 abasinga gaali mabujje.
Akakiiko k’eggwanga akeddembe lyobuntu mu alipoota yaako era kalaze nti eky’ennaku waliwo n’emisango emirala mingi egy’okusobya ku baana egitawaabibwa eri ebitongole ebikuuma ddembe, gimalirizibwa eyo mu ngeri y’ekimpukumpuku, songa abasinga okusobya ku baana abo, ate bebabeera babalinako obuvunanyizibwa obw’okubalabirira.
