Amasaza 8 gesozze omutendera gwa quaterfinal mu mpaka za Masaza ga Buganda ez’omupiira ogw’ebigere ez’omwaka guno 2025 oluvanyuma lw’omutendera gw’ebibinja okukomekerezebwa olwaleero.
Amasaza agagenze ku quaterfinal ye Buluuli, Busujju ne Ssese mu kibinja Bulange, olwo Gomba, Buddu ne Busiro nebawanduka.
Kyaggwe ne Ssingo bayiseewo mu kibinja Muganzirwazza olwo Kkooki, Butambala, Mawogola ne Kabula nebawanduka.
Mu kibinja Masengere Buweekula, Mawokota ne Bugerere bayiseewo olwo Kyadondo, Bulemeezi ne Buvuma nebawanduka.
Emipiira egigaddewo ebibinja, Busujju ekubye Buddu e Kakindu goolo 3-1, Ssese erumbye Busiro omwayo e Ssentama n’egikubirayo goolo 2-0 ate Buluuli ekubye Gomba e Migyera goolo 2-1.
Kkooki egudde maliri ne Kyaggwe 0-0 e Kasambya Kyotera, Ssingo ekubye Kabula goolo 1-0 e Mityana ate nga Butambala ekubye Mawogola goolo 5-3.
Buweekula ekubye Kyadondo goolo 2-0 e Mubende, Bugerere erumbye Bulemeezi omwayo n’egikubirayo goolo 1-0 e Kasana Luweero ate nga Mawokota erumbye Buvuma omwayo n’egikubirayo goolo 2-1 e Magyo.
Bisakiddwa: Isah Kimbugwe
