Omuzannyi wa ttiimu y’eggwanga ey’omupiira ogw’ebigere eya Uganda Cranes, Bobosi Byaruhanga, azeemu okwegatta ku club ya Austin FC II eya America ku ndagaano ya mwaka gumu.
Bobosi avudde mu club ya MFK Vyskov eya Czech Republic, era mu ya Austin FC II azeeyo mulundi gwakubiri.
Mu Club eno yabaddeyo omwaka oguwedde 2023 ku bwazike era nabayamba okuwangula ekikopo kya Major League Soccer Next Pro.
Mu ndagaano gy’ataddeko omukono ne club ya Austin FC II, mulimu akawaayiro ak’okugyongezaayo omwaka omulala singa bongera okumatira ensamba ye okutuuka ku nkomerero ya 2025.
Omulundi ogwasoose nga ali ku bwazike mu club eno, yagizanyidde emipiira 26 nagiteeberamu goolo nakola n’emikisa egivamu goolo 3.
Bobosi Byaruhanga omupiira ogw’ensimbi yagutandikira mu club ya Vipers eya Uganda Premier League, era FUFA yamulonda nga omuzannyi eyasinga okucanga endiba mu Uganda mu 2021.
Bisakiddwa: Issah Kimbugwe
