Obunkenke bubadde bw’amaanyi e Buloba ku luguudo oludda e Mityana, abasajja ababadde mu ngoye za bulijjo bwebakubye amasasi omusajja agambibwa okuba nga yoomu ku babadde mu lukwe lw’okuwamba omukungu w’ekitebe kya Egypt mu Uganda.
Bino bibaddewo ku ssaawa nga munaana ez’emisana nga 13 November,2024.
Ab’ebyokwerinda okuva mu bitongole ebyenjawulo ababadde bambadde engoye eza bulijjo, babadde batambulira mu mmotoka ezze erondoola emmotoka kika kya Noah No.UAZ 247 S abajibaddemu 3 obwedda mwebatambuliza omuwambe, era bagisaliddeko mu luguudo wakati nebalagira omugoba waayo okuyimirira n’agaana, ekiddiridde nebamukuba amasasi.
Abasirikale baggyeyo omuwambe nebamussa mu mmotoka wabwe n’abantu abalala 2 nebabakwata nebagenda nabo.
Police y’e Buloba etuuse oluvannyuma okulaba ogubadde n’eggyawo akubiddwa amasasi nemutwala mu ddwaliro, era tebalina kyeboogedde ku mbeera ebaddewo.
Wabula okusinziira ku kiwandiiko ekifulumiziddwa police, omuwambe ye Muhammad Ali Abu Amidu munnansi wa Egypt era nga mukozi ku kitebe kya Egypt mu Uganda.
Yawaambibwa nga 08 November,2024 e Zzana ku luguudo lwe Ntebbe.
Okuva olwo ab’oluganda lwe babadde tebaddangamu kumulaba, wabula abawambe babadde babaweereza obubaka nga babasaba emitwalo gya ddoola ya America ena ( $40,000), nebabalaalika nti singa tebaziweereza babadde bagenda kumutta.
Police etegeezezza nti ab’oluganda lwa Muhammad baawaaba ku police era netandikirawo okulondoola abawambe, era nti babadde bamutambuza mu bifo ebyenjawulo.
Okutuusa bwebabakwatidde e Buloba ku luguudo lw’e Mityana, babadde bagenda kwekukuma mu Pearl Motel e Buloba mu district ye Wakiso.
Bisakiddwa: Lukenge Sharif
