Abatuuze ku kyalo Kawangire mu muluka gwe Kiddokolo mu District ye Ssembabule banunudde omwana omuyizi abadde awambiddwa abasajja 2, n’ekigendererwa ekitanategerekeka.
Omwana abadde awambiddwa ye Annet Natukunda myaka 7 asoma P.2 ku Nnambiirizi muslim primary school mu district ye Ssembabule.
Omwana ono muwala wa Yokaana Kazungu ne Santiini Kassande abe Kawangire.
Abaana ababadde ne munnabwe abadde awambiddwa bategeezezza nti basanze abasajja babiri ku ddaamu y’amazzi nga booza pikipiki, nebatandika okubagoba, olwo munabwe Natukunda ensawo y’ebitabo nemugwako.
Bwayimiridde okujironda abasajja nebamukwata era nebamuteeka ekintu ku mimwa.
Banne batandise okukuba enduulu era webaangidde omuntu omulala abadde atambula nebamubuulira ogubadde, nebongera okukuba enduulu esombodde abantu abalala.
Omu ku badduukitize Ignastius Lukandwa agambye nti omwana abadde aba pikipiki bamusuddewo nebasaako kakokola tondeka nnyuma, wabula nga bamutaddeko ebisago.
Bisakiddwa: Jimmy Ssekabiito