Police yakazuula emirambo 11 egy’abantu abafiiridde mu muliro ogukutte emmotoka y’amafuta ku kyalo Kigoogwa e Matugga, ku luguudo oluva e Kampala okudda e Bombo.
Abantu abalala abasoba mu 10 nabo baddusiddwa mu ddwaliro e Bombo nga bali mu mbeera mbi.
Aberabiddeko ng’omuliro gubwatuka, bagamba nti waliwo adduse ekiwalazzima ng’atuuntumuka omuliro, agudde ku kkubo era eyo gy’afiiridde.
Abantu abakoseddwa kuliko ababadde bagenze okwesenera ku mafuta, abalala babadde munju zabwe abalala mu maduuka nga bali ku mirimu gyabwe bakakkalabya.
Akabenje kano kaguddewo ku ssaawa nga zigenda okuwera 10 ez’emisana, nga 22 October,2024.
Amayumba 7 nago gasirikkidde mu njega eno.
Omuduumizi wa Police atwala ekitundu ekyo Moses Nanoka agambye nti omugoba wa mmotoka evuddeko akabenje akwatiddwa, era agenda kubayambako okwongera okunoonyereza okuzuula ekituufu ekivuddeko emmotoka eno okugwa n’ekwata omuliro ogusse abantu.
Agambye nti emirambo gitwaliddwa mu ddwaliro e Mulago okwongera okwekebeggyewa, era nga ne bannyinijo bakusooka okugyibwako endagabutonde okukakasa, olw’okubanga gyonna giyidde nnyo negyifuuka bisiriiza.
Bisakiddwa: Tonny Ngabo
Ebifaananyi: Ssendegeya Muhammad