Parliament eyisizza ekiteeso ekyongeza omuwendo gw’abalamuzi ba kkooti enkulu okuva ku balamuzi 83 okutuuka ku balamuzi 151.
Ssemateeka w’eggwanga ennyingo 138(b) yeewa parliament obuyinza obwongeza omuwendo gw’abalamuzi nga yesigama ku kiteeso ekibeera kireeteddwa government, bwetyo nesalawo okulinnyisa omuwendo ogwo oba okugaana.
Minister wa ssemateeka n’essiga eddamuzi era ssenkaggale wa DP yatutte ekiteeso kino mu parliament nga kisembeddwa omumyuka wa ssabawolereza wa government Jackson Kafuuzi.
Minister Norbert Mao abuulidde parliament nti gavument yakirabye nti abalamuzi ba court enkulu 83 abaliwo tebamala okusinziira ku bwetaavu obuliwo, kwekusalawo nti omuwendo guno gulinyisibwe okutuuka ku balamuzi 151.
Minister Mao agambye nti werutuukidde olwaleero,ensimbi eziri eyo mu trillion 80 n’okusoba zezitubidde mu misango egikandaaliridde mu kkooti ezenjawulo, omuli emisango gy’ettaka, emisango gy’obusuubuzi nebirala, olwomuwendo gw’abalamuzi abalina okuwuliririza emisango egyo okubeera abatono.
Mu mbeera yeemu, minister Norbert Mao abuulidde parliament nti government era eri mu nteekateeka okwanjula ennongosereza mu tteeka lya Judicature Act mu bbanga eritali lyawala, okwongeza omuwendo gwabalamuzi ba kkooti ejjulirwamu okuva ku balamuzi 15 okutuuka ku balamuzi 56.
Mulimu era nookwongeza omuwendo gw’abalamuzi ba kkooti ensukulumu okuva ku balamuzi 11 okutuuka ku balamuzi 21, nga kyonna kikolebwa okutuusa obuweereza eri bannansi ababwetaaga.
Kinnajjukirwa nti mu mwaka 2017, parliament era yayisa ekiteeso ekyayongeza omuwendo gw’abalamuzi ba kkooti enkulu okuva ku 49, okutuuka ku balamuzi 83, ababaddewo mu kiseera kino
Ennyingo eye 13, eyetteeka lya Judicature Act ,lisaawo omuwendo gw’abalamuzi 25 abamanyiddwa mu tteeka eryo, saako akulira kkooti enkulu amanyiddwanga Principle Judge, wabula omuwendo ogwo etteeka lyerimu ligamba nti gusobola okwongezebwa singa parliament ekkiriza, okuyita mu kiteeso government kyegyanjulira.#
