Entambula yeyongedde okukaluba eri abo ababadde beeyambisa oluguudo oluva e Ssembabule okuyita e Mateete nebagguka e Mbiriizi tekyali mmotoka eyita.
Okuva olutindo lw’omugga Katonga bwerwakutulwamu amazzi, abantu abasinga batandiika okweyambisa oluguudo olwa Mpigi-Kanoni- Maddu – Ssembabule – Villamaria, abamu babadde bakutulira Ssembabule n’ebadda ku lw’ettaka oluyita e Mateete okukendeeza ku lugendo, nebagwa e Mbiriizi nebeyongerayo e Lyantonde ,Mbarara n’ewalala.
Wabula kati abayita e Mateeete nga luwezaako Km 37 n’ebitundu tebakyasobola kuyita, oluguudo luguddemu mu kitundu ekimanyiddwa nga mu Ndeeba nga wakava e Mateete.
Oluguudo luno lubadde lwatandika mpola okugendamu ennyaafa, newasigalawo ekitundu emmotoka weziyita mpolampola, wabula kati nakyo kikutuddwamu.
Ssentebe we Kyebongotoko Bashir Ssenyondo agambye nti waliwo olusozi omuva amazzi aganjadde mu kkubo, saako emmotoka enzito ebiviiriddeko oluguudo luno nalwo okugwamu.
Mmotoka 2 ezibadde zisalinkiriza zezaakagwa mu kitundu kino mu mugga Nabyoleke.
Emmotoka lukululana okuli No. UAZ 733N ne UBF 012P zezaagudde mu mugga guno.
Wadde nga zikasiringi zireeteddwa okusikayo emmotoka zino, lukululana emu No. UAZ 733N ebadde etisse cement ekyalemeddeyo olwóbuzito, so nga tewali mmotoka ndala esobola kugituukako.
Bisakiddwa: Jimmy Ssekabiito #
