Abaana 3 bafiiridde mu muliro ogukutte ennyumba mwebabadde ku kyalo Lugali mu muluka gwe Lugali mu ggombolola ye Ngando mu district ye Butambala.
Kiteeberezebwa nti abantu abettima basoose kuyiwa mafuta ga petulooli kunju eyo nebajiteekera omuliro mu kiro kya nga 21 October,2025.
Enjega eno egudde mu maka ga Lubowa Abaasi, abadde taliiwo nga yasuze mu makage amalala, ng’abazzukulu 9 babadde basigadde ne Jajja Mukyala.
Kigambibwa nti ku ssaawa nga bbiri ez’ekiro, Jjajabwe omukyala waliwo omukazi amukubidde essimu ng’amutegeeza nti waliwo muzzukuluwe omulala ku kyalo ekiriranyeewo yabadde agwiriddwa ekimbe nga yetaaga okuyambibwa, era naye nadduka zambwa okugendayo, wabula kigambibwa nti abatemu baandiba nga baabadde bamubuzaabuza aveewo awaka olwo bakole ettemu.
Lubowa ategeezezza nti abazzukulu abawonyeewo bamutegeezezza nti abatemu basoose kubayita nebabasaba ebbaafu wabula nebataggulawo, nekyaddiridde kuwulira nga babayiira ebintu ebiriinga amazzi mu bisenge, ekyaddiridde kuwulira muliro ogutuntumuka nebakuba enduulu.
Ssentebe we Lugali Mpindi Ayubu omu ku baduukirize, agambye nti basaanze abaana 2 bamaze okufa, ate owokusatu baasanze akyalimu akalamu nebamuddusa mu ddwaliro gyafiiridde.#
