Club ya URA egucangira mu liigi ya babinywera eya Uganda Premier League, mu butongole eyanjulidde abawagizi baayo omuzannyi omupya Rahumat Ssenfuka.
Rahumat Ssenfuka yegasse ku bazannyi abalala abaguliddwa URA mu katale aka January okuli Moses Waisswa ne Disan Galiwango.
Rahumat Ssenfuka abadde yasembayo kuzannyira club ya Wakiso Giants kati eri mu FUFA Big League.
Aguliddwa okudda mu bigere bya Laban Tibita, omutendesi Hussein Mbalangu gwe yalagidde anoonye ekibanja ewalala olw’omutindo ogw’ekiboggwe.
Ssenfuka asuubirwa okuzannya omupiira gwe ogusooka mu mujoozi gwa URA ku lw’okusatu nga 04 March,2026, URA bwenaaba ettunka ne Mbarara City mu kisaawe e Nakivubo.
URA eri mu kifo kya 14 mu liigi ku ttiimu 16.
Erina obubonero 15 mu mipiira 17.
Bisakiddwa: Isah Kimbugwe
