Empaka z’Amasomero ga senior ez’omupiira ogw’ebigere eza National Schools Championships eziyindira mu district ye Ngora zeyongeddemu ebbugumu, oluvanyuma lw’okutuuka ku mutendera gwa quarterfinal.
Ku quaterfinal St Mary’s Kitende akalulu kagisudde ku Kibuli SS, nga ttiimu zino ze zikyasinze okuwangula ekikopo kino emirundi 11 buli omu.
St Mary’s Kitende okutuuka ku quaterfinal ewanduddemu Blessed Sacrament Kimaanya ku goolo 3-0, ate nga Kibuli SS ewanduddemu Masaka ku peneti goolo 5-4 oluvanyuma olw’okulemagana 0-0.
Buddo SS akalulu kagisudde ku Uganda Martyrs High School Lubaga ku mutendera gwa quarterfinal, nga Buddo SS okutuuka wano ewanduddemu Wisdom High School ku goolo 3-1, ate nga Uganda Martyrs High School Lubaga ewanduddemu Greenlight Islamic SS ku peneti goolo 4-2 oluvanyuma olwokulemagana 0-0.
Bukedea Comprehensive School egenda kwambalagana ne Kyadondo SS, nga Bukedea Comprehensive School ewanduddemu Kawempe Muslim SS ku goolo 1-0, ate nga Kyadondo SS ewanduddemu Kichwamba High School ku goolo 1-0.
Jinja Progressive Academy JIPRA egenda kuttunka ne Mentor High School, nga JIPRA ewanduddemu bannantamegwa b’empaka ez’omwaka oguwedde aba St Julian High School Seeta ku goolo 3-1, ate nga Mentor High School ewanduddemu Jinja Comprehensive School ku goolo 1-0.
Omutendera gwa quarterfinal gugenda kuzannyibwa ku monday nga 12 May,2025.
Bisakiddwa: Isah Kimbugwe
