Ssaabaduumizi wa police ya Uganda Abas Byakagaba akakasizza bannauganda nti tebabeeramu kutya kwonna tewali agenda kuleeta fuggyo mu kulonda kwa 2026, n’ategeeza nti abakuuma ddembe beteeseteese ekimala okuziyiza bonna abagala okukola efugyo.
Ssabapolice egambye nti okuva kampeyini bwezatandika mu September, 2025 wabaddewo okukwatagana nabawenja akalulu naddala ku kifo kya president, nti wabula mu nnaku ntono eziyise bannakibina kya NUP nga bakulembeddwamu abakwatidde bendera ku bwa President Robert Kyagulanyi Ssentemu bagezezzaako okuva ku mateeka agaabalambikibwa, police kwekusalawo okutandika okubaηanga n’omukka ogubalagala abalala nebagombebwamu obwala nebatwalibwa mu kooti.
Mu ngeri etali ya bulijjo, Abas Byakagaba yayogedde mu lukuηaana lwa bannamawulire police lwetuuza buli monday ku kitebe kyayo e Nagguru.
Byakagaba abuulidde bannamawulire nti police tegenda kuwa mukisa gwonna eri munnabyabufuzi akukuba kampeyini nga bwayagala, sso nga amateeka agalambikibwa akakiiko k’ebyokulonda wegali era gamanyiddwa bulungi.
Mungeri yemu ayogedde ku kikwekweto kyebaakola mu bitundu bye Mbarara, president akwatidde NUP Bandera Robert Kyagulanyi Ssentamu lweyaliyo ng’awenja akalulu abawerako ne bakwatibwa, Byakagaba agambye nti baali baggumikiriza ekimala ng’abawagizi ba NUP babasosonkereza kwekubakwata.
Byakagaba era alabudde abantu baagambye nti bakozesa emitimbagano okutambuza ebifananyi n’obutambi obw’obulimba ku bakuuma ddembe, nalabula abakikola nti bagenda kukwatibwa obudde bwonna.
Byakagaba era ataangazizza ku kya police okutabangula enkuηaana za Kyagulanyi Ssentamu,naategezezza nti ye tebamulinaako buzibu ng’omuntu, obuzibu buva ku kyakuva ku mateeka g’eby’okulonda.
Ku ky’okukuba omukka ogubalagala mu nkuηana za NUP oluusi nga zimaze okuggwa, ssabapolice agambye nti waliwo abamu kubawagizi abasosonkereza abakuuma ddembe omuli n’okubavuma ne basalawo okubanukula bwebatyo.#
