Ekitongole kya police ekinoonyereza ku buzzi bw’emisango ki CID kyayise abamu ku babaka ba parliament n’abakungu ba government abatali bamu kitebe kyayo e Kibuli okwenyonyolako ku bigambibwa nti benyigira mu bulyake n’obukenuzi nga bayitira mu parliament ne bitongole mwebakolera.
Ababaka okuli omukyala owa Lwengo Cissy Dionizia Namujju, Yusuf Mutembuli owa Bunyole East ne Paul Akamba owa Busiki County bebasoose okukunyizibwa era nebalemererwa okumatiza bambega ebyababuuziddwa, ekyabaviriddeko okusula mu kaddukulu kabakungu ku police.
Oluvannyuma police ebatutte ku police ye Kira, bwebavudde eyo, nebatwalibwa mu maka gabwe okubaako ebintu ebyenjawulo byebetegereza.
Yonna gyebatwaliddwa babadde batambulizibwa mu mmotoka enzirugavu kika kya Drone, ng’endabirwamu zaayo zisiigiddwa langi.
Bano okukwatibwa kyavuddeko ku mukulembeze we ggwanga Gen Yoweri Kaguta Museveni okutegeeza nti aggudse olutalo ku bali b’enguzi, naddala ababaka n’abakozi ba parliament abekobaana n’qba ministry y’ebyensimbi.
President yategeeza nti obujjulizi bwonna obubaluma abulina, era nti obukundi bwonna obunyagulula ensimbi z’omuwi w’omusolo bwali bubakeeredde.
Ku police ye kira mu Wakiso ababaka balambudde ku bannabwe, wabula nga tebagala kwogerako eri banamawulire era eyaliiko omubaka wa Bunyole West mu parliament James Waluswa agambye nti asaba amateeka gakole ku bantu bonna abenyigira mu nguzi awatali kusosola.
Ensonda era zigamba nti waliwo ababaka nabakungu ba government abalala abayitiddwa ku kitebe kya bambega e Kibuli okubaako byebanyonyola ku byekusa kunguzi, era nga kigambibwa nti waliwi abalala abaatidde ennyo olw’embeera egenda mu maaso, nti era wulidde bino ne balinya ennyonyi nebafuluma eggwanga.#
