Ebitongole by’Obwakabaka ebyasinga mu ntambuza y’emirimu mu 2025 bikwasiddwa ebirabo byebaawangula.
Omumyuka asooka owa Katikkiro era Minisita avunanyizibwa ku nzirukanya y’emirimu mu Bwakabaka Owek. Twaha Kaawaase Kigongo bw’abadde akwasa abawanguzi ebirabo agambye nti okuva enkola y’okuvuganya mu bitongole by’Obwakabaka lwe yatandikibwawo emyaka 5 egiyise, waliwo okugenda mu maaso kw’amaanyi mu ntambuza y’emirimu.
Ladiyo ya Kabaka Cbs esitukidde mu kirabo ekya kampuni y’Obwakabaka esukkulumye ku ndala mu buweereza, eky’omwaka 2025.
Owek.Twaha Kigongo Kawaase akuutidde ba Ssenkulu b’ebitongole by’Obwakabaka okukola emirimu gyabwe mu ngeri ey’ekikugu era ematiza, nti kubanga ebitongole byebakulembera bikola ky’amaanyi ku kubeerawo kw’Obwakabaka.
Agambye nti baateekawo olupimo kwebasinziira okufuna ebitongole ebisukkulumye ku binnaabyo mu Biti eby’enjawulo nti era musanyufu kubanga okuva enkola eno lweyatandikibwawo emyako etaano egiyise Wabaddewo okugenda mu maaso mu Nkola y’emirimu mu bitongole byonna.
Ssenkulu wa Cbs Omukungu Micheal Kawooya Mwebe agambye nti bagenda kwongera omutindo mu Nkola yeemirimu kibasobozese okuddamu okusukkuluma ku bitongole ebirala mu Bwakabaka n’omwaka guno 2026.
Ekirabo kino CBS ekitutte omulundi ogw’okubiri ogwomuddiηanwa.
Ba Ssenkulu okuva mu bitongole by’Obwakabaka 22 beetabye ku mukolo guno, era nga buli omu aweereddwa ensimbi okusinziira ku mutendera mu buweereza gweyawangula.
CBS yeesinze okufuna ettu eddene nga ekwasiddwa Ceeke ya bukadde bwa shs 5.
Bisakiddwa: Ssekajjiijja Augustus
