Ababaka abali ku ludda oluvuganya government babaze ekiwandiiko ekyegaana n’okuvumirira ensimbi obukadde 100, ezigambibwa nti zaaweereddwa buli mubaka, ng’akasiimo okuva mu government olw’okuyisa etteeka eryaggyawo ekitongole kya Uganda Coffee Development Authority.
Mu lukungaana lwa bannamawulire olutuuziddwa ku Parliament nga bakulembeddwamu omubaka akiikirira Butambala Muhammad Muwanga Kivumbi, ku lw’akulira oludda oluwabula government mu parliament ategeezezza nti bayisizza ekiwandiiko kino okulaba nga buli mubaka awakanya ssente zino assaako omukono.
Kivumbi ategeezezza nti buli mubaka anajeeema okussaako omukono kijja kuba kyoleka lwatu nti yafunye ensimbi zino obukadde 100, wasinzidde okulabula omubaka yenna eyafunye ku nsimbi zino okuzizzaayo nga embeera tenasajjuka.
Era nti kyasaliddwawo yenna anaazuulwa nga ssente zino yazifuna naasirika ssiwakuweebwa kaadi ya kibiina ki NUP, mu kuvuganya mu kalulu ka bonna aka 2026.
Ababaka 31 bebaakateeka omukono ku kiwandiiko kino.
CBS mu kwogerako n’omwogezi w’akabondo k’ababaka abava mu NRM Alex Kintu Brandon, bino byonna ayongedde okubiwakanya era abiyise bya bufuzi eby’okusiiga enziro, era alabudde abakulembeddemu kaweefube ono nti singa teebekomako baakubakuba mu mbuga z’amateeka.#
