Ttiimu y’essaza Buddu ewangudde omupiira gwayo ogusoose mu mpaka z’amasaza ga Buganda ez’omupiira ogw’ebigere ez’omwaka guno 2024 bw’ekubye Kyadondo goolo 1-0.
Omupiira guno ogubaddeko n’okuluma obugigi guzannyiddwa mu kisaawe kya Kitovu Arena mu kibuga Masaka, era goolo ya Buddu ebadde yakusimula Peneti okubiddwa Joseph Kayondo.
Mu ngeri yeemu ttiimu y’essaza Gomba ekubiddwa omupiira ogw’okubiri ogw’omuddiringanwa, nga Ssingo egikubye goolo 4-0 mu kisaawe e Mityana, ate nga omupiira ogwasooka Kyaggwe yagikuba goolo 2-0 e Kabulasoke.
Kkooki egudde maliri ne Buweekula 0-0 e Kyotera, Buluuli ekubye Butambala goolo 2-1 e kakooge ate nga Kyaggwe ekubye Mawogola goolo 2-1 e Mukono.
Ebya Bulemeezi abawangula ekikopo kya season ewedde nabyo byongedde kuba bibi, Bugerere ebakubidde e Ntenjeru goolo 3-1, nga kati Bulemeezi ekubiddwa omupiira ogw’okubiri ogw’omuddiringanwa, kuba Buluuli yasooka kubakuba goolo 1-0 e Kasana Luweero.
Busujju ekubye Kabula goolo 3-1 e Kakindu ate nga Mawokota egudde maliri ne Busiro 1-1 mu kisaawe e Buwama.
Bisakiddwa: Isah Kimbugwe
