Club ya Express FC mukwano gwabangi erangiridde nga bwetadde abazannyi 4 okunoonya ebibanja ewalala, mu kiseera nga club eno eyita mu kusoomozebwa okwamaanyi mu by’ensimbi.
Okugenda kwa bazannyi bano Express FC ekuyisizza ku mikutu gyayo emitimbagano, nga abazannyi bano ye Richard Basangwa, Hakim Wandera, Ssenogga Muhammad Kagawa ne Rashid Kawaawa.
Ensonda ezesigika zikakasiza nti abazannyi bano bagenda kwegatta ku club ya NEC eya Uganda Premier League, etendekebwa eyali omutendesi wa Express Badru Kaddu Mukasa.
Express yamazeko oluzannya olusooka olwa liigi nga ya 10 n’obubonero 16 okuva mu mipiira 15.
Mu mupiira 15 yawanguddeko 4, amaliri ga 4 ate yakubiddwa emipiira 07, nga yateeba goolo 14 ne tebwamu goolo 17.
Oluzannya olwokubiri egenda kuluggulawo nga ettunka ne Entebe UPPC nga 14 February,2026 mu kisaawe e Nakivubo.
Bisakiddwa: Isah Kimbugwe
