Boodi y’Ekitongole ky’Obwakabaka eky’Ebyobusuubuzi ki Mengo Chamber of commerce Ltd etongozeddwa, neesabwa okuyambako Obwakabaka okugundiira mu byobusuubuzi ,omuli bannamakolero abalimi,abalunzi ne kampuni z’obuweereza obwenjawulo.
Bwabadde atongoza Boodi eno mu Bulange e Mengo,Katikkiro wa Buganda Charles Peter Mayiga asabye Boodi eno eyambeko mu kusitula ebyenfuna by’abantu ba Kabaka, nga ekwasaganya eby’obusuubuzi mu bwesimbu, omuli n’okutuusa eddoboozi ly’abasuubuzi eri bekikwatako.
Minister w’Ebyobulimi, Obulunzi n’Obwegassi Owek Hajji Amiisi Kakomo,yebazizza Ssaabasajja Kabaka olw’Okusiima ekitongole kino kitandikewo mu Bwakabaka.
Ssentebe wa Boodi ya Buganda chamber of commerce ye Omuk John Fred Kiyimba Freeman, amyukibwa Owek. Steven Kayiwa Omukiise mu Lukiiko lwa Buganda era nga yaakulira Global paints,ba memba kuliko Hajji Musa Bugere akulira Luuka plastics, Omuk Sarah Kironde Ssemanda, Owek Ritah Namyalo , Omuk Robert Nsereko.
Ssentebe wa Boodi ya Mengo chamber of commerce Ltd, Omuk John Fred Kiyimba Freeman, yebazizza Ssaabasajja Kabaka olw’Okusiima namukwasa Obuvunaanyizibwa buno,era naawera okuyunga abasuubuzi aba buli langi, okulaba nga bayambako mu nzirukanya y’emirimu ,kko n’okunoonya ba Member.
Omuk. Freeman agambye nti mu buweereza buno, baakufuba okugatta Omutindo ku by’ettunzi, Okusikiriza abavubuka mu by’obusuubuzi, okutabaganya abasuubuzi, n’okukolagana ne government eya wakati.
Bisakiddwa: Kato Denis
