Omutendera ogw`omukaaga ogwa Ppulogulaamu Entanda ya Buganda Nantaggwa buwoomi ogwa Kafungula Nkete gutandise namaanyi, era ebadde nsitaano yennyini okufunako abazira ababiri abayingidde olubiri.
Abameganyi abayitawo ku mutendera guno bafuuka bazira, nga mubano mwemunaava omuzira mu bazira w`Omwaka guno 2025.
Munnakyaddondo Mukooza Julius eyeddira Ente ye muzira asoose okuyitawo okwesogga Olubiri, mu lumeggana olubaddewo mu kiro kya nga 18 December,2025 bwakulembedde banne bwebabadde mu lw`okano n`obugoba 10, ate ye Omuseese Mpanga Ronald eyeddira Effumbe nawandukiramu awo bwafunye obugoba 8.
Munnamawokota Nanyunja Hasifah eyeddira Enkima ne Munnabuddu Muyingo Charles eyeddira Omusu, bbo basoose kusibagano ku bugoba 9 buli omu, olwo abalamuzi be Ntanda nebabongerayo ebibuuzo bibiri buli omu.
Ebibuuzo binno webigweredde nga Nanyunja Hasifah ebibye byonna abyanukudde mu butuufu bwabyo, era naye nayitawo okwesoga Olubiri ng`Omuzira, wabula ye Muyingo Charles ayanukudeko ekibuuzo kimu era bwatyo nawandukiramu awo.
Entanda ya Buganda egenda kukomekerezebwa mu Lubiri e Mengo mu Nkuuka y`omwaka guno nga 31st December, omunalaangirirwa Omuzira mu Bazira.
Enkuuka`ewagiddwa Kkampuni y’essimu eya MTN Uganda ng’abawavujirizi Abakulu, wamu n’essomero lya Timnah Schools e Kasana Luweero.
Bisakiddwa: Musisi John
