Kooti ejulirwamu egaanye okuyimiriza enteekateeka z’okutwala n’okutunda eby’obugagga by’obusiraamu ebya Uganda Muslim Supreme Council (UMSC) oluvannyuma lw’okulemererwa okusasula ebbanja lya buwumbi bwa shs 18.9, ezibabanjibwa Justus Kyabahwa.
Omulamuzi Christopher Gashirabake agambye nti Uganda muslim Supreme Council eremereddwa okuleeta obujulizi obulaga nti okujulira kwebaasooka okuteekayo mu kooti nga bawakanya sente empitirivu Kyahabwa z’ababanja, nti banaakuwangula.
Omulamuzi Gashirabake agambye nti Kyabahwa yaddukira mu kooti ng’ayagala bwenkanya, n’olwekyo ekiragiro ekyayisibwa Commercial Court nga 16th November,2023, nga kimukkiriza okutunda eby’obugagga by’obusiraamu kigende mu maaso nga kissibwe mu nkola yesasule.
Ebimu ku by’obugagga ebiri mu lusuubo kuliko plot 30 ku William Street, plot 23 – 25 ziri ku Old Kampala era kwekutudde omuzikiti omukulu,waliwo ettaka eriri e Kyanja n’ttaka eddala liwerako square mile namba liri Bukwe mu Hoima district, eddala liri Jinja ne Mbale .
Singa Uganda Muslim Supreme Council eremererwa okusasula ebbanja ery’obuwumbi 18.9 olwa nga 21 December,2023 terunayita, Justus Kyabahwa wakuba n’eddembe eritunda eby’obugagga ebyo yesasule.
Kyabahwa agamba nti yagula ettaka ku UMSC erisangibwa mu district ye Ssembabule ku buwumbi bwa shs 3.5 mu mwaka gwa 2020.
Annyonyola nti wabula teyasobola kukozesa ttaka eryo, oluvannyuma lw’okuzuula nti ettaka lye limu Muslim Supreme Council yali yaligabako liizi eri kampuni ya ENHAS ya myaka 15, egyataandika mu 2013 -2028, kyokka neremererwa okumuddiza ensimbi ze.
Kyabahwa yasalawo okuddukira mu kooti etaawulula emisango gy’ebyenfuna eya Commercial Court, eyalagira Uganda Muslim Supreme Council okumusasula ensimbi ze nga ziteereddwamu amagoba ga bitundu 12% buli mwezi.
UMSC yawakanya ensala ya kooti era n’ejulira.
Munnamateeka wa Justus Kyahabwa nga ye Meddie Kalule, ayogeddeko eri bannamawulire oluvannyuma lw’ensala ya kooti, n’ategeeza nti amagoba ag’ebitundu 12% galambikiddwa mu ndagaano gyebaakola ne UMSC mu 2020, bwebaali beyama okuwaayo ettaka lyebaabaguza, ekyabalema okutuukiriza kati emyaka gisoba mu esatu.
Bisakiddwa: Betty Zziwa
