Olukiiko lwaba minister ku ludda oluvuganya government lutandise ku nteekateeka y’okukungaanya ebirowoozo okuva mu babaka booludda oluvuganya government, kwebyo byebandyagadde biteekebweko essira mu mbalirira yeggwanga eyomwaka ogujja 2023/2024.
Embalirira eno egenda kubagibwa oludda oluvuganya government ng’eyawukana kweyo eyabagibwa government eri mu buyinza.
Oludda oluvuganya government ku ntandiikwa y’omwaka guno lwalangirira nti lugenda kutandika okubaga embalirira gyerugamba nti yesaanidde,era esobola okugasa bannansi.
Akulira oludda oluvuganya government Mathias Mpuuga Nsamba bweyali ayanjula enteekateeka eno ,yagamba nti ebyokuwabulanga government ku byerina okukola kyekiseera bisuulibwe mu kasero, lwemale kukubaga ebintu ebyandibadde bikolebwa singa bebabadde mu buyinza.
Omwogezi w’oludda oluvuganya government mu parliament era omubaka omukyala owa district ye Mityana Joyce Bagala Ntwaatwa agambye nti ensisinkano eyawamu ey’ababaka booludda oluvuganya government egenda kutuula ku woteeri Africana olwaleero, ba minister booludda oluvuganya government banjule ebirowoozo nebiteeso mu mbalirira eno, ababaka babikubaganyeeko ebirowoozo nokugattako ebyabwe
Okusinziira ku Joyce Bagala ebirowoozo ebigenda okukunganyizibwa olwaleero byebigenda okuteekebwa mu mbalirira eyawamu enaayanjulirwa eggwanga ng’ennaku zomwezi 30 march, 2023#
