Ttiimu y'essaza Gomba eraze amaanyi mu mpaka z'A masaza ga Buganda eza 2026 ez'omupiira ogw'ebigere, bwekubye Buddu goolo 3-0 mu mupiira ogubaddeko n'obugombe mu kisaawe e Kabulasoke.

Goolo eziwadde Gomba obuwanguzi ziteebeddwa Kasule Meddie, Alfred Ssebunya ne Waisswa Hassan.

Emikisa gya Gomba okugenda ku mutendera gwa semifinal gyongedde okweyerura, ate egya Buddu gyevedde.

Ttiimu zino zigenda kuddingana ku Sunday ejja nga 20 September, mu kisaawe kya Kitovu Sports Arena.

 Buddu wakiri ejja kwetaaga nayo okuwangula goolo 3-0 omupiira guno okweyongerayo. 

Omupiira omulala, Kyaggwe nayo etaangaziza emikisa gyayo okugenda ku semifinal bwerumbye Mawogola omwayo mu kisaawe e Ssembabule n'egikubirayo goolo 2-1, bajja kuddingana nga 20 September e Mukono. 

Busujju nayo ekubye Butambala goolo 1-0 mu kisaawe e Kakindu, nga bano bajja kuddingana nga 19 September, mu kisaawe kya Kibibi SS. 

Bugerere egudde maliri ne Kyadondo 0-0 mu kisaawe e  Ntenjeru, nga ne bano bajja kuddingana nga 20 September,e Wampeewo. 

Final ya Masaza ga Buganda ejja kubaawo nga 31 October,2026 mu kisaawe e Wankulukuku. 

Bisakiddwa: Isah Kimbugwe