Abadde omuyimbi era nga mukubi wa biviga Nnakinku mu Afrigo Band Moses Matovu attiddwa mu Market Zone e Kibuli ku makya nga busaasaana nga 24 September, agenda kuziikibwa e Kyanja nga 25 September,2026.

Moses Matovu afiiridde ku myaka 77 egy'obukulu, nga yazaalibwa mu 1949.

Police Nsamba Vincent agiyambeko mu kubuuliriza kweriko okwokuzuula abakubye Moses Matovu, naafa nga yakatuusibwa mu ddwaliro e Kibuli gy'abadde addusiddwa.

Olumuggye mu ddwaliro e Kibuli natwalibwa mu muzikiti e Kibuli okumusaalira.


Okusaalira Moses Matovu ku muzikiti e Kibuli

Jjaja w'obusiiramu Omulangira Dr.Kasiimu Nakibinge Kakungulu , Katikkiro wa Buganda  Charles Peter Mayiga n'omumyuka we Professor Twaha Kawase Kigongo, ba minister ba Kabaka abakyawereza naabawummula begasse ku bikuumi n'ebikumi by'abakungubazi ebikunganidde ku muzikiti e Kibuli okusalira omuyimbi nakinku Moses Matovu.


Abalala abetabye kusalira Moses Matovu ku kasozi Kibuli kubaddeko, senkulu w'ekitongole kya Uganda CommunicationsCommission George William Nyombi Tembo, omubaka wa Makindye East Hajji Ali Kasirye Nganda Mulyanyama, bama Sheik, Omulangira Kalifani Kakungulu, Owek. Makubuya , Owekitibwa Gaster Lule Ntake nabalala bangi.

Omulangira Nakibinge nga abadde mukwano gw’omugenzi Matovu, bannabitone abawadde amagezi nti bayigire ku mugenzi Moses Matovu, olw’empisa ze n’obwetowaze.

 


 

Katikkiro wa Buganda  Charles Peter Mayiga, naye asinzidde awo nasaasira banabitoone bonna mu ggwanga olwokuviibwako omuntu abadde omukugu obwenkanidde awo.

 

Agambye nti Matovu abadde awa obudde emirimu gy'akola, ekimusobozesezza okuyiiya n'okuyiimba ennyimba ezigenda okunyumira emirembe egy'enjawulo. 

 

Owomumbuga era asabye bannabitoone okubeera ebesiimbu bavuuke abetutumu nokwegombesa abalala, ng’omugenzi Moses Matovu bwabadde.

 

 

Omumyuka asooka owa Katiikiiro wa Buganda, Prof.Dr Twaha Kawase Kigongo, asinzidde Kibuli nasaba abasigaddewo  okukoPpa ebirungi Moses Matovu byabadde nabyo, naddala okuwa abantu ekitiibwa saako okwagala eddiini ye.

 

 

Senkulu w'e Kitongole kyebyepuliziganya, ki Uganda Communications Commission (UCC), George William Nyombi Tembo, asinzidde wano nategeeza nti Matovu akutte ku bitone by'abantu bangi, era wakujjukirwa ebbanga lyonna.

 

Nnyombi Tembo asabye bannabitone abasigaddewo okutwala mu maaso omukululo Moses Matovu gwalese.

 


 

Akulira  Ddaawa ku muzikiti ekibuli, Sheik Yasin Kiweewa abantu abajjukizza okwefumitirizanga ku  kufa, bamanye nti balikumpi nakwo era bakole ebirungi nga tebanagenda.

 


 

Bannabitone nga bakulembeddwamu omuyimbi Mesearch Ssemakula, bagambye nti Moses Matovu, yeeyabaagazisa okuyingira mu kisaawe ky’okuyimba, era abadde kyakulabirako kinene gyebali, nga bakumusubwa nnyo.

 


 

James Wasula, kulwa Afrigo Band, ategeezezza abakungubazi nti bagenda kutwala mu maaso n'ebiruubirirwa by'omugenzi ne beebaza ne Jjajja Mbuga, abakkirizza okuwerekera omugenzi ku muzikiti e Kibuli. 

 

Adam Bukenya kulwa baana bomugenzi, agambye nti bafiiriddwa mukwano gwabwe, era yeebazizza Omulangira Mbuga, olwokubabeererawo.

 

 

Akulira  olujja omuva Moses Matovu, ate era kitaawe ,Kulwa family, Hajji Kaluuma Kasiimu, agambye nti omugenzi abadde mpagi nnene mu family yaabwe, era bafiriddwa nnyo.

 

Ate ye Ssentebe wa bawagizi ba ttimu yomubira eya Sports Club Villa, Kasule Hassan, agambye nti omugenzi y'omu kubaatandikawo ttimu ya Villa, era bakumujjukira.

 

Owekitibwa Gasita Lule Ntake, abadde munwanyi wa Moses Matovu, agambye nti omugenzi abadde amwegomba olwengeri gyabadde akola ebintu n'obwesimbu.

 

 

Omulambo gwa Moses Matovu bwegujjiddwa e Kibuli gutwaliddwa ku  National Theare, bannabitone okugukubako eriso evannyuma, ate oluvannyuma omulambo gutwalibwe e Kyanja gyebakumye Ogwoto, olwo aziikibwe enkya ku Friday nga 25 September,2026 ku saawa kkumi ez’olwegulo.

 

Moses Matovu yazaalibwa nga 16 June 1949.

 

Ezimu ku nnyimba Moses Matovu zaayimbye ne Afrigo band;


-Amazzi ge Nnyama

-Sikulimba 

-Omutanda Gyali 

-Teri mubi Kunsi

-Speed

-Oswadde Nnyo

-Guttuke kebaayimba ne Juliana Kanyomozi

-Twazze kukyala

-Jiimu olwa Joanita Kawalya

-Obbangayina olwa Reacheal Magoola nendala nnyingi.